Дэлхийн поп-панк хөгжмийн ертөнцийн томоохон төлөөлөл болох Америкийн Blink-182 хамтлаг шүтэн бишрэгчдийнхээ дунд багагүй шуугиан тариад байна. Тэд өөрсдийн 2001 онд гаргасан "Take Off Your Pants and Jacket" цомгийн нүүр зураг болон логог сошиал хуудсаараа дамжуулан дахин нийтэлсэн нь ирэх онуудад ямар нэгэн томоохон ажил төлөвлөж байж магадгүй гэх таамаг төрүүлэв.
Энэхүү цомог нь хамтлагийн түүхэн дэх хамгийн амжилттай бүтээлүүдийн нэг бөгөөд "The Rock Show", "First Date" зэрэг хит дуунуудаараа 2000-аад оны залуусын сонсох дуртай урсгалыг тодорхойлсон юм. 2026 онд энэхүү цомог мэндэлсний 25 жилийн ой тохиох тул хамтлагийн гишүүд Марк Хоппус, Том Делонг болон Трэвис Баркер нар ямар нэгэн тусгай арга хэмжээ, дахин хэвлэлт эсвэл ойг тохиолдуулсан аялан тоглолт төлөвлөж байж болох талтай.
Хэдийгээр хамтлагийн зүгээс албан ёсны мэдэгдэл хийгээгүй ч тэдний энэхүү үйлдэл нь шүтэн бишрэгчдийн дунд хүлээлтийг үүсгээд байна. Blink-182 нь сүүлийн жилүүдэд бүрэн бүрэлдэхүүнээрээ эргэн нэгдэж, дэлхий даяар амжилттай аялан тоглолтуудыг хийж байгаа билээ. Тиймээс энэ удаагийн "чимээгүй" дохио нь тэднийг дараагийн том төсөлдөө бэлдэж байгааг илтгэж байж мэдэх юм.
Хөгжим сонирхогчид болон хамтлагийн үнэнч шүтэн бишрэгчид Blink-182-ын цаашдын мэдээллийг тэсэн ядан хүлээж байна. Та бүхэн ч гэсэн энэхүү домогт хамтлагийн эргэн ирэлт болон ойг тохиолдуулан гарах шинэ мэдээллүүдийг бидэнтэй хамт байгаарай.
