Онлайн худалдааны томоохон платформ болох eBay компани болон тус компанийн хуучин удирдлагууд сэтгүүлчдийн эсрэг явуулсан дарамт шахалтын хэргээс үүдэн 55.7 сая долларын нөхөн төлбөр төлөхөөр тохиролцжээ. Энэхүү хэрэг нь eBay болон цахим худалдааны салбарын мэдээллийг хүргэдэг «EcommerceBytes» сайтын үүсгэн байгуулагч Ина болон Дэвид Стайнер нарт холбоотой юм.
Дарамт шахалтын эхлэл
2019 онд тус сайтын зүгээс eBay компанийн үйл ажиллагааг шүүмжилсэн нийтлэлүүдийг нийтэлсний дараа компанийн аюулгүй байдлын багийнхан сэтгүүлчдийг онилсон байна. Стайнерын гэр бүлийн мэдээлснээр, тэдний гэрт амьд жоом, үхрийн ураг, цустай баг, амьд аалз, ялааны авгалдай болон оршуулгын цэцгэн эрхи зэрэг аймшигтай зүйлсийг илгээж, сэтгэлзүйн дарамт үзүүлж байжээ. Мөн цахим орчинд тэднийг дарамталж, гэрт нь очихоор сүрдүүлсэн байна.
Хуулийн хариуцлага
2021 онд эхлүүлсэн иргэний хэргийн хүрээнд eBay компани 46.15 сая доллар, тус компанийн гүйцэтгэх захирал асан Девин Вениг 2 сая доллар, ахлах дэд ерөнхийлөгч асан Венди Жонс 500,000 доллар, харилцаа холбооны ахлах ажилтан асан Стив Ваймер 50,000 доллар тус тус төлөхөөр болжээ. Нийт нөхөн төлбөрийн 48.7 сая доллар нь хохирогч Стайнерын гэр бүлд шууд очих бол үлдсэн 7 сая долларыг ашгийн бус байгууллагуудад хандивлахаар төлөвлөжээ.
Ил тод байдлын ач холбогдол
Энэхүү тохиролцоонд ямар нэгэн нууцлалын заалт ороогүй нь анхаарал татаж байна. Стайнерын гэр бүл энэ нь бусад корпорациуд шүүмжлэлтэй нийтлэл бичсэн сэтгүүлчдийг дарамтлахаас сэргийлэхэд чухал нөлөөтэй гэж үзжээ. Баримт бичгүүдээс харахад eBay-ийн удирдлагууд тухайн үед сэтгүүлчийг хэрхэн дарах талаар дотооддоо ярилцаж байсан нь илэрсэн байна. Тухайлбал, Стив Ваймер сэтгүүлчийн нийтлэлийн талаар “Бид энэ эмэгтэйг дарах болно” гэж хэлж байсан бол Девин Вениг “Хэрэв бид түүнийг унагах гэж байгаа бол яг одоо л цаг нь” гэж бичиж байжээ.
