Гоо сайхны салбарын томоохон нэгдэл E.l.f. Beauty компани сүүлийн улирлын санхүүгийн тайлангаа танилцууллаа. Тус компанийн цэвэр борлуулалт 36 хувиар өсөж, 479.4 сая ам.долларт хүрсэн байна. Энэхүү өсөлтөд загвар өмсөгч Хайли Биберийн үүсгэн байгуулсан Rhode брэнд голлох үүрэг гүйцэтгэжээ.
E.l.f. Beauty компани Rhode брэндийг зах зээлд нэвтэрснээс нь хойш гурван жилийн дараа, нэг жилийн өмнө 1 тэрбум хүртэлх ам.долларын хэлцлээр худалдан авсан юм. Rhode брэнд нь арьс арчилгааны бүтээгдэхүүнийг 30-аас доош ам.доллароор худалдан авагчдад хүргэж, тансаг мэдрэмж төрүүлэхүйц байдлаар зах зээлд байр сууриа олсон байна. Тус брэнд энэ улиралд 160 сая ам.долларын цэвэр борлуулалт хийжээ.
Олон улсын зах зээл дэх өргөжилт
Rhode брэнд нь Sephora сүлжээ дэлгүүрийн Хойд Америк дахь хамгийн эрэлттэй брэндүүдийн нэг болсон бөгөөд тус дэлгүүрт нэвтрэх үедээ секунд тутамд гурван бүтээгдэхүүн борлуулж байв. Брэндийн гүйцэтгэх захирал Ник Влахосын мэдээлснээр, Rhode одоо олон улсын зах зээлд идэвхтэй өргөжиж байна. Тухайлбал, зургадугаар сард Мексикийн зах зээлд нэвтэрч, Европын долоон оронд худалдаалагдаж эхлээд байгаа юм. Одоогоор тус брэнд 25 оронд шууд хэрэглэгчдэдээ бүтээгдэхүүнээ хүргэж байна.
Хэрэглэгчийн үнэнч байдал
Rhode брэнд нь шинэ хэрэглэгчдийг татахаас гадна байнгын үйлчлүүлэгчдийнхээ хүрээг хадгалахад анхаарч байна. Хязгаарлагдмал тоотой цуглуулга худалдаанд гаргах үед тус брэнд нэг өдрийн дотор 27 сая ам.долларын борлуулалт хийж, 90,000 шинэ хэрэглэгчтэй болжээ. Үүний зэрэгцээ, шууд борлуулалтын 70 хувийг өмнө нь тус брэндээс худалдан авалт хийж байсан хэрэглэгчид бүрдүүлсэн байна. Брэндийн зүгээс хэрэглэгчдийг дахин дахин татахын тулд бүтээгдэхүүний сонголтоо нарийн төлөвлөж, шинэлэг байдлаар бэлэг барих бодлого баримталж байгаагаа мэдэгдлээ.
