Дэлхий даяарх улс орнуудын засгийн газрууд интернэт орчин дахь насны баталгаажуулалтын асуудалд ихээхэн анхаарал хандуулах болсонтой холбогдуулан Google компани өөрийн аппликейшн дэлгүүртээ шинэ өөрчлөлт хийж эхэллээ. Тус компани Play Age Signals API хэмээх шинэ системийг дэлхий даяар нэвтрүүлж байгаагаа зарласан байна.
Энэхүү шинэ технологи нь хэрэглэгчдийн хувийн нууцад халдахаас сэргийлж, насны ангиллыг баталгаажуулах зорилготой юм. Google-ийн тайлбарласнаар, энэ систем нь иргэний үнэмлэх эсвэл нүүр царай таних зэрэг хувийн мэдээлэл шаардахгүй бөгөөд харин компанийн өмнө нь ашиглаж байсан Family Link аппликейшнтэй шууд холбогдох аж.
Шинэ системийн онцлог
Эцэг эхчүүд өөрсдийн удирддаг хүүхдийн бүртгэлүүд дээр насны хязгаарыг тохируулах боломжтой юм. Жишээлбэл, хүүхдийнхээ насны ангиллыг тогтоосноор тухайн аппликейшнүүд хүүхдийн насны онцлогт тохирсон контентыг санал болгох боломжтой болно. Мөн эдгээр насны хүрээ нь динамик шинж чанартай бөгөөд хүүхэд өсөж томрохын хэрээр автоматаар дараагийн түвшинд шилжих боломжтой гэнэ.
Заавал ашиглах албагүй
Google-ийн зүгээс энэхүү шинэ боломж нь хүүхдийн данс бүрт заавал байх ёстой зүйл биш гэдгийг онцолжээ. Энэ нь бүрэн сонголтот (opt-in) буюу эцэг эхчүүд хүсвэл ашиглах, хүсэхгүй бол хэзээ ч унтраах боломжтой нэмэлт хяналтын хэрэгсэл юм. АНУ-ын зарим мужууд аппликейшн дэлгүүрүүдэд насны хязгаарлалт тогтоох хуулийг хэрэгжүүлж эхэлсэнтэй холбогдуулан Google ийнхүү технологийн шийдлээ өргөжүүлж байна.
