Америкийн алдарт рок хамтлаг Greta Van Fleet шинээр гаргасан Palace for the People цомгоороо Billboard-ийн Top Hard Rock Albums чартын 10-р сарын 24-ний жагсаалтыг тэргүүллээ. Энэ нь тус хамтлагийн хувьд уг чартыг тэргүүлсэн тав дахь цомог болж байна.
Luminate-ийн мэдээлснээр, 10-р сарын 15-наар дуусгавар болсон долоо хоногт тус цомог АНУ-д нийт 30,000 цомгийн эквивалент нэгж цуглуулжээ. Үүнээс 26,000 нь цомгийн цэвэр борлуулалт байсан бөгөөд Top Album Sales чартын 2-р байранд орсон байна. Мөн 17,000 хувь нь пянзаар борлогдсоноор Vinyl Albums чартыг тэргүүлсэн тус хамтлагийн гурав дахь бүтээл боллоо. Түүнчлэн бүх төрлийг багтаасан Billboard 200 чартад Palace for the People цомог 9-р байранд жагсаж, тэдний топ 10-т багтсан дөрөв дэх цомог болсон байна.
Дөрвөн хүний бүрэлдэхүүнтэй Greta Van Fleet хамтлаг 2017 оны From the Fires цомгоос хойш гаргасан бүх томоохон бүтээлээрээ Top Hard Rock Albums чартыг тэргүүлсээр ирсэн түүхтэй. Тодруулбал, 2018 оны Anthem of the Peaceful Army, 2021 оны The Battle at Garden’s Gate, 2023 оны Starcatcher зэрэг цомгууд бүгд 1-р байранд хүрч байв. Тэдний 2017 онд гаргасан анхны Black Smoke Rising нэртэй богино хэмжээний (EP) цомог нь 10-р байранд хүрч байжээ.
Шинэ цомгийн уран бүтээлүүдээс Hot Hard Rock Songs чартад гурван дуу зэрэг багтсан байна. Тэдгээрийг 653,000 стрим хийгдсэн үзүүлэлтээр 7-р байранд орсон Heya дуу тэргүүлжээ. Мөн 809,000 радио хандалт, 425,000 стримээр 12-р байранд орсон Tear It Down дуу болон 362,000 стримээр 20-р байранд бичигдсэн Saw You Stand дуунууд багтсан байна. Үүнээс гадна Tear It Down дуу Mainstream Rock Airplay чартад 21-р байрт шинэ амжилт тогтоогоод байна.
