Дэлхийн томоохон автомашин үйлдвэрлэгч Hyundai Motor компани ирэх жилүүдэд хүн дүрст роботыг үйлдвэрлэлдээ нэвтрүүлэхээр төлөвлөж байгаа билээ. Тус компани 2028 оноос эхлэн АНУ-д робот ажиллуулахаар зорьж байгаа ч энэхүү төлөвлөгөө нь Өмнөд Солонгос дахь ажилчдын ажил хаялттай холбоогүй гэдгийг онцоллоо.
Сүүлийн үед хэвлэл мэдээллийн хэрэгслүүдээр Өмнөд Солонгос дахь Hyundai-ийн хамгийн том үйлдвэрт болж буй хэсэгчилсэн ажил хаялтыг роботжуулалтын төлөвлөгөөтэй холбон тайлбарлаж байсан юм. Үүнтэй холбогдуулан тус компани Ars Technica сайтад өгсөн албан ёсны мэдэгдэлдээ, ажилчдын тавьж буй шаардлага нь роботтой огт хамаагүй гэж мэдэгджээ.
Ажилчдын гол шаардлага
Hyundai-ийн мэдэгдэлд дурдсанаар, үйлдвэрчний эвлэлийн гишүүдийн гол анхаарлаа хандуулж буй асуудлууд нь цалин хөлсийг нэмэгдүүлэх, урамшуулал олгох болон тэтгэвэрт гарах насыг сунгах зэрэг эдийн засгийн шинжтэй асуудлууд юм.
Тус компани “Солонгос дахь үйлдвэрүүддээ робот нэвтрүүлэх боломжит асуудал нь одоогийн хөдөлмөр, удирдлагын хэлэлцээрийн нэг хэсэг биш” гэдгийг тодотгосон байна. Мөн Hyundai Motor компани нь үйлдвэрчний эвлэлтэй бүтээлч байдлаар хамтран ажиллаж, ажилчид болон компанийн урт хугацааны ашиг сонирхолд нийцсэн тохиролцоонд хүрэхийн төлөө хичээнгүйлэн ажиллаж байгаагаа илэрхийлжээ.
