Шинэ хүчин чадал бүхий Apple TV төхөөрөмж зах зээлд гарахад сар хүрэхгүй хугацаа үлдээд буй энэ үед Instagram аппликэйшн Apple TV дээр ажиллах боломжтой болжээ. Apple-ийн App Store дээр уг аппликэйшнийг iPhone, iPad төдийгүй Apple TV дэмждэг хэмээн шинэчлэн бүртгэсэн байна.
Энэ нь Instagram-ын хувьд том дэлгэц рүү чиглэсэн анхны алхам биш юм. Тэд 2025 оны сүүлээр Amazon Fire TV дээр туршиж эхэлсэн бөгөөд 2026 оны дундуур Samsung-ийн зурагтуудад нэвтрүүлж байсан тул уг ТВ аппликэйшнийг нэвтрүүлсэн хамгийн сүүлийн платформ нь Apple болж байна.
ТВ хэлбэрт шилжсэнээр Instagram гар утас, таблетад түгээмэл босоо бичлэгүүдээс гадна зурагтын харьцаанд тохирсон хэвтээ видеог санал болгох шаардлагатай болж байгаа юм.
Үүнээс гадна урсгал үйлчилгээ болон ухаалаг зурагтуудад нэвтрэх ажлынхаа хүрээнд тус платформ шинэ төрлийн видео хэлбэрүүдийг судалж байна. Тухайлбал, урт хэмжээний бичлэг, цуврал контент, шууд дамжуулалт болон захиалгын үйлчилгээг судалж байгаа бөгөөд энэ нь видео контентын тэргүүлэгч YouTube платформтой илүү ойр өрсөлдөх нөхцөлийг бүрдүүлж магадгүй юм.
Instagram-ийг эзэмшигч Meta компани хүмүүсийн үзэх дуртай богино бичлэгүүд том дэлгэцээр олуулаа үзэхэд ч тохиромжтой байна гэж найдаж буй бөгөөд контент бүтээгчдэд видео байршуулах, шууд дамжуулахад нь аль болох хялбар байлгах чиглэлээр хамтран ажиллаж байна.
