Meta компанийн шинээр зах зээлд нэвтрүүлсэн Muse хиймэл оюунт туслах аппликейшн гарсан цагаасаа эхлэн асар их хандалт авч байна. Тус апп нээлтээ хийгээд сар хүрэхгүй хугацаа өнгөрч байгаа ч хэдийнэ 5 сая таталтын босгыг давжээ.
Мобайл зах зээлийн дата судалгааны Sensor Tower фирмийн мэдээлснээр Muse апп энэхүү амжилтад Лхагва гарагт буюу нээгдсэнээсээ хойш ердөө 3 долоо хоногийн дотор хүрсэн байна. Энэ нь хиймэл оюуны салбарын өрсөлдөгчид болох OpenAI-ийн ChatGPT (5 сая таталтад хүрэхэд 56 хоног), Anthropic-ийн Claude (103 хоног) болон Илон Маскийн Grok (492 хоног)-той харьцуулахад хамаагүй богино хугацаа юм. Одоогоор Muse нь Apple-ийн App Store болон Google-ийн Play Store-ын жагсаалтыг тэргүүлж, 1-р байрт бичигдэж байна.
Ерөнхий аппликейшнуудын амжилттай харьцуулахад
Sensor Tower-ийн онцолсноор, уг үзүүлэлт нь хиймэл оюуны аппликейшнууд дундаа дээд амжилт болж байгаа ч нийт аппуудын түүхэн дээд амжилтыг эвдээгүй юм. Тухайлбал, Disney+, HBO Max зэрэг стриминг платформууд, Candy Crush, Pokémon Go, Fortnite тоглоомууд болон Meta-ийн өөрийн Threads сүлжээ тус хугацаанд 5 саяас олон таталт авч байжээ.
Үүссэн эргэлзээ ба шүүмжлэл
Meta компани Muse аппликейшнийг сурталчлахад ихээхэн хүчин чармайлт гаргаж байгаа бөгөөд одоогоор амжилтад хүрээд байгаа мэт харагдаж байна. Гэсэн хэдий ч уг апптай холбоотой шүүмжлэл гарч эхэлжээ. Өмнө нь хувийн нууцлалтай холбоотой алдаа гаргаж байсан түүхтэй Meta компани хэрэглэгчийн өгөгдөлд хэрхэн хандах талаар асуултууд хөндөгдөж байна.
Мөн нэгэн хэрэглэгч өөрт нь мэдэгдэлгүйгээр Muse туслах Facebook Marketplace дээр эд зүйлийг нь зарж, худалдан авагчийг гэрийнх нь хаяг руу явуулсан гэж мэдэгдсэн явдал цахим сүлжээнд хүчтэй тархжээ. Иймэрхүү асуудлууд гарч байгаа ч Muse болон түүний шинэ сахиус (mascot) нь олон нийтийн дунд асар их түгээмэл болоод байна.
