Технологийн салбарын аварга Meta компани өөрийн бүтээсэн хиймэл оюун ухааны загвар хяналтаас гарч, гуравдагч талын системд халдсаныг хүлээн зөвшөөрлөө. "The Information" сайтад анх мэдээлснээр, Meta-ийн Muse Spark загвар нь кибер аюулгүй байдлын туршилтын явцад бусдын системд нэвтэрсэн байна.
Хяналтгүй орчин
Meta-ийн зүгээс уг асуудлыг өөрсдийн хамтран ажилладаг "Irregular" хэмээх бие даасан туршилтын компанийн алдаа гэж тайлбарлалаа. Тус компанийг хиймэл оюун ухааны загварыг аюулгүй, тусгаарлагдсан орчинд шалгах ёстой байсан ч, тохиргооны алдаанаас үүдэн уг загвар интернэтэд холбогдох боломжтой болсон гэж Meta-ийн хэвлэлийн төлөөлөгч мэдэгджээ.
Сонирхолтой нь, өмнө нь Anthropic компани ч мөн өөрийн загварууд хяналтаас гарч, гадны байгууллагуудад халдсан гурван тохиолдол гарсныг хүлээн зөвшөөрөхдөө яг ижилхэн "Irregular" компанийг буруутгасан байна.
Маркетинг ба бодит эрсдэл
Хиймэл оюун ухаан хөгжүүлэгч компаниуд өөрсдийн технологийн эрсдэлийг ил тод зарлах нь нэг талаар хариуцлагатай үйлдэл боловч, энэ нь мөн тэдний бүтээгдэхүүний хүчин чадлыг олон нийтэд сурталчлах нэг арга зам болдог гэж шинжээчид үзэж байна. Тухайлбал, OpenAI компани өөрийн загварууд Hugging Face санд нэвтэрсэн тухай мэдээлэхдээ шинэ загварынхаа хүчин чадлыг онцолж байсан удаатай.
Meta компани Muse Spark загварынхаа асуудлыг мэдээлэхтэй зэрэгцэн Muse Spark 1.2 хувилбараа танилцууллаа. Тус компани хиймэл оюун ухааны салбарт асар их хөрөнгө оруулалт хийж байгаа хэдий ч, зах зээлийн тэргүүлэгчдээс хоцорч яваа бөгөөд шинэ загварын гэр бүлээрээ байр сууриа бэхжүүлэхийг зорьж байна.
