Эмэгтэйчүүдийн хувцас загварын салбарт үйл ажиллагаа явуулдаг Reformation Inc. компани Нью-Йоркийн хөрөнгийн бирж (NYSE) дээр анхны хувьцаагаа гаргаж, олон нийтийн арилжаанд албан ёсоор нэгдлээ. Permira хувийн хөрөнгө оруулалтын сангийн дэмжлэгтэй тус компани 14.1 сая ширхэг хувьцааг санал болгож, нийт 210.9 сая ам.долларын хөрөнгө босгосон байна.
Пүрэв гарагт эхэлсэн арилжаагаар компанийн хувьцаа анхны санал болгосон үнэ болох 15 ам.доллар дээрээ тогтвортой нээгдсэн бөгөөд өдрийн төгсгөлд ердөө 8 центээр өсөж, 15.08 ам.доллараар хаагджээ. Энэ нь хөрөнгө оруулагчид шинээр хувьцаа гаргаж буй компаниудын хувьд тун болгоомжтой хандаж байгааг харуулж байна. 2026 онд хувьцаагаа олон нийтэд нээлттэй болгосон компаниудын 49 орчим хувь нь IPO үнээсээ доогуур ханштай арилжаалагдаж байгаа юм.
Салбарын ерөнхий дүр зураг
Энэ өдөр мөн сэндвичний сүлжээ Jersey Mike’s Subs компани анхны арилжаагаа эхлүүлсэн ч хувьцааных нь ханш 23 ам.долларын IPO үнээсээ 6 хувиар унаж, сул үзүүлэлттэй гарчээ. Мөн түүхэн дэх хамгийн том IPO гэгдэж байсан SpaceX компани зургадугаар сард нээлтээ хийхдээ 20 орчим хувиар өссөн боловч түүнээс хойш ханш нь IPO үнээсээ буурсан байна.
Reformation компанийн хувьд өмнө нь удирдлагын түвшинд гарсан арьс өнгөөр ялгаварлан гадуурхсан гэх дуулиан болон соёлын өмчлөлийн асуудлаар шүүмжлэлд өртөж байсан түүхтэй. Хэдий тийм ч компанийн гүйцэтгэх захирал Хали Боренштейн CNBC агентлагт өгсөн ярилцлагадаа, "Reformation бэлэн байна. Бид жижиглэн худалдааг шинэчлэн тодорхойлж, загварын салбарт брэндийн гүйцэтгэх үүргийг инновацаар баяжуулахад ихээхэн хүчин чармайлт гаргасан" хэмээн онцолжээ. Тэрээр компанийг өргөжин тэлэхэд бэлэн суурьтай болсон гэж үзэж байна.
