Технологийн салбарын тэргүүлэгч Samsung компани “Galaxy Unpacked 2026” арга хэмжээнийхээ үеэр эвхэгддэг ухаалаг утасны шинэ үеийн загваруудаа албан ёсоор танилцууллаа. Энэ удаад Galaxy Z Flip 8, Galaxy Z Fold 8 болон Galaxy Z Fold 8 Ultra гэсэн гурван төрлийн шинэ загвар зах зээлд нэвтэрч байна.
Шинэ загваруудын үнэ ба онцлог
Шинэ загварууд нь өмнөх үеийн Z Flip 7 болон Z Fold 7 загваруудыг залгамжлан гарч байгаа бөгөөд дэлхий дахинд үүсээд буй санах ойн хямралын улмаас Z Flip 8 болон Z Fold 8 Ultra загваруудын үнэ өмнөх жилээс 100 ам.доллараар өссөн байна. Урьдчилсан захиалга долдугаар сарын 22-ноос эхэлсэн бөгөөд 8-р сарын 7-ноос худалдаанд гарах юм.
Galaxy Z Flip 8 загвар нь 1,199.99 ам.доллараас эхлэх бөгөөд ягаан, графит, крем, гаа гэсэн дөрвөн өнгөний сонголттой. Энэхүү утас нь 6.9 инчийн Dynamic AMOLED дэлгэцтэй, 12GB RAM, 256GB эсвэл 512GB багтаамжтай, 4K дүрс бичлэг хийх чадвартай хос камертай юм.
Galaxy Z Fold 8 нь 1,899.99 ам.долларын үнэтэй бөгөөд 4:3 харьцаатай дэлгэц, 5.5 инчийн гадна болон 7.6 инчийн үндсэн дэлгэцтэйгээр худалдаанд гарна. Харин цувралын хамгийн өндөр үзүүлэлттэй Galaxy Z Fold 8 Ultra загвар нь 2,099.99 ам.доллараар үнэлэгдэж байна.
Урьдчилсан захиалгын нөхцөл
Хэрэглэгчид Samsung, Amazon болон T-Mobile, AT&T зэрэг үүрэн холбооны операторуудаар дамжуулан урьдчилсан захиалгаа өгөх боломжтой. Тухайлбал, Amazon-оор захиалсан тохиолдолд 200-350 ам.долларын бэлгийн карт авах боломжтой бол T-Mobile болон AT&T операторууд шинэ шугам нэмэх эсвэл хуучин төхөөрөмжөө солиулах тохиолдолд тодорхой хэмжээний хөнгөлөлт үзүүлэхээ мэдэгджээ.
Samsung-ийн энэхүү шинэ загварууд нь эвхэгддэг утасны зах зээлд өрсөлдөөнийг улам бүр идэвхжүүлж байна.
