Технологийн салбарт тэргүүлэгч Sony компани өөрийн алдартай WH-1000XM6 чихэвчийг шинэ "олив саарал" өнгөний сонголттойгоор худалдаанд гаргалаа. Энэхүү өнгө нь өмнөх хар болон мөнгөлөг хувилбаруудаас илүү онцгой, зөөлөн харагдах байдлыг бүрдүүлж байна.
Одоогоор уг бүтээгдэхүүн 60 ам.долларын хямдралтай буюу 459.99-ийн оронд 399.99 ам.доллараар худалдаалагдаж байгаа нь сонирхогчдод тохиромжтой боломж юм.
Техникийн хувьд шинэ загвар нь дуу чимээ тусгаарлах хамгийн дэвшилтэт HD Noise Canceling Processor QN3 чипээр тоноглогдсон. Энэхүү чип нь өмнөх XM5 загвараас 7 дахин хурдан ажиллах чадалтай бөгөөд 12 микрофоныг ашиглан хүрээлэн буй орчны дуу чимээ, агаарын даралтын өөрчлөлтөд бодит цаг хугацаанд дасан зохицож, дуу чимээг төгс тусгаарладаг байна.
Mashable сайтын тоймч Тимоти Бек Верт уг чихэвчийг туршиж үзээд, дуу чимээ тусгаарлах чадварыг нь "ид шидтэй" мэт хэмээн үнэлжээ. Тэрээр хөгжим сонсоогүй үедээ ч ажлын байрандаа анхаарлаа төвлөрүүлэхийн тулд уг чихэвчийг ашигладаг байна. Мөн өдрийн турш зүүсэн ч чихэнд ачаалал өгөхгүй, тав тухтай загвартай болохыг онцолсон юм.
Түүнчлэн, шинэ загварын нугалагддаг хийц, соронзон түгжээтэй илүү бат бөх аяллын цүнх нь өмнөх загваруудаас давуу талтай болжээ. Дуудлага хийх үед хүний дуу хоолойг ялган авч, орчны чимээг шүүх зургаан микрофон бүхий AI технологитой болсон нь ярианы чанарыг сайжруулсан байна.
