Дэлхийд алдартай сансрын технологийн SpaceX компани анх удаагаа санхүүгийн тайлангаа олон нийтэд танилцууллаа. Тус компанийн орлого улирлын байдлаар 7.8 тэрбум ам.долларт хүрсэн нь шинжээчдийн таамаглаж байсан 6.82 тэрбум ам.доллароос давж, өмнөх оны мөн үеэс 92 хувиар өссөн үзүүлэлттэй байна. Мөн тус компани 541 сая ам.долларын цэвэр алдагдалтай ажилласан нь шинжээчдийн таамаглаж байсан 2.12 тэрбум ам.долларын алдагдлаас харьцангуй бага үзүүлэлт юм.
Хэдийгээр орлогын үзүүлэлт эерэг гарсан ч SpaceX-ийн хувьцааны ханш арилжааны эхэн үед 10 хувиар уналаа. Үүнд голлон нөлөөлсөн хүчин зүйл нь компанийн хиймэл оюун ухаан (AI) болон сансрын хөлгийн технологид зориулж буй хөрөнгө оруулалт юм. Тайлангаас харахад, тус компани хиймэл оюун ухааны салбарт 16 тэрбум ам.доллар орчим хөрөнгө зарцуулсан нь өмнөх улирлаас хоёр дахин өссөн дүн бөгөөд Уолл Стритийн шинжээчдийн хүлээлтээс хамаагүй өндөр байна.
Илон Маскийн удирддаг тус компани өөрийн үйл ажиллагааг хиймэл оюун ухаан болон дата төв хөгжүүлэгчийн чиглэлд өргөжүүлэхээр зорьж байгаа юм. Компанийн зүгээс энэхүү өндөр зардлын түвшин ойрын хоёр улирлын туршид хэвээр үргэлжлэх төлөвтэй байгаагаа мэдэгдлээ. Энэхүү их хэмжээний зардал нь хөрөнгө оруулагчдын дунд болгоомжлол төрүүлж, хувьцааны ханшид сөргөөр нөлөөлсөн байна.
