Хөгжим болон подкаст стримингийн аварга платформ болох Spotify аудио номын үйлчилгээгээ 2026 оны эцэс гэхэд дэлхийн 180 орны сар тутмын 750 сая идэвхтэй хэрэглэгчдэдээ хүргэхээр зорьж байгаагаа зарлалаа. Шведэд төвтэй тус компани гурван жилийн өмнө АНУ болон Их Британийн Premium хэрэглэгчдэд аудио ном сонсох боломжийг анх олгож, улмаар 22 зах зээлд өргөжүүлээд байсан юм.
Компанийн зүгээс тавдугаар сард болсон хөрөнгө оруулагчдын уулзалтын үеэр мэдээлснээр, 2024 оноос 2025 оны хооронд аудио ном сонссон цаг 60 хувиар өссөн байна.
Залуу үеийнхэн болон шинэ боломжууд
Spotify өнгөрсөн 2025 оны дундуур Audiobooks+ нэртэй сарын нэмэлт 11.99 ам.долларын төлбөртэй шинэ багцыг нэвтрүүлсэн. Сард 12.99 ам.доллар төлдөг Premium хэрэглэгчид энэхүү нэмэлт үйлчилгээг авснаар сарын ном сонсох хугацаагаа 15-аас 30 цаг болгон хоёр дахин нэмэгдүүлдэг байна. Долдугаар сарын байдлаар энэхүү төлбөрт үйлчилгээг 1 сая гаруй хэрэглэгч ашиглаж, Audiobooks+-аас олох жилийн тогтмол орлого 100 сая ам.долларт хүрсэн гэж тооцоолжээ.
Spotify-ийн удирдлагуудын хэлснээр аудио ном сонсогчдын бараг тал хувь нь 35-аас доош насныхан байгаа бөгөөд олон хэл дээр номын сонголтыг нэмэгдүүлэх нь залуу уншигчдыг татах чухал алхам болно гэж үзэж байна.
Шинэлэг функцүүд ба хиймэл оюун
Түүнчлэн Spotify хэвлэмэл ном худалдан авах боломжийг Bookshop.org-той хамтран нэвтрүүлснээс гадна Page Match хэмээх шинэ боломжийг танилцуулжээ. Энэ нь хэрэглэгчдэд цаасан номоо уншиж зогссон хуудаснаас нь эхлэн Spotify дээр үргэлжлүүлэн сонсох боломжийг олгодог байна. Компанийн мэдэгдсэнээр Page Match-ийг ашигладаг хэрэглэгчид номыг хоёр дахин хурдан дуусгадаг бөгөөд тэдний гуравны хоёр нь 35-аас доош насныхан ажээ.
Мөн бие даасан зохиолчдод зориулан мэргэжлийн түвшний аудио ном бүтээх боломж бүхий Spotify Audiobooks Selects хөтөлбөрийг эхлүүлж, ElevenLabs-ийн технологийг ашигласан хиймэл оюунт хоолойн хэрэгслийг санал болгож эхэлсэн байна.
