Технологийн аварга Spotify компани өөрийн аппликейшнийг хүмүүс видео подкаст үздэг газар болгохын тулд олон жилийг зарцуулж байгаа билээ. Гэвч тэдний хийсэн шинэ алхам нь өөрийн эзэмшлийн нэгэн видео шоуг өөр платформ руу давхар хүргэхэд чиглэжээ. Spotify-ын эзэмшдэг спорт, подкастын The Ringer сайт өөрийн спорт бооцооны шоу болох «Ringer Wise Guys» (хуучин нэрээр The Ringer Gambling Show)-ыг Twitch платформ дээр шууд дамжуулж эхэлсэн байна.
The Ankler-ийн анх мэдээлснээр, Amazon-ы эзэмшдэг Twitch суваг дээр тус шоуны эхний дугаар 8 дугаар сарын 10-ны Даваа гарагт цацагджээ. Шоунд «Cousin Sal» Iacono, Joe House, Raheem Palmer, Anthony Dabbundo, Tate Frazier нар оролцдог байна. The Ringer-ийг үүсгэн байгуулагч Билл Симмонс X хуудсаараа дамжуулан шоуны дугаар бүр Twitch-ээр шууд цацагдахын зэрэгцээ подкаст платформууд дээрээ ч хэвээр үлдэнэ гэдгийг баталжээ. Энэхүү алхам нь 2018 оноос хойш идэвхгүй байсан The Ringer-ийн Twitch хаягийг эргэн сэргээж байгаа юм.
Үзэгчдийн анхаарах ёстой чухал зүйл нь «Ringer Wise Guys» шоу YouTube-ийг орхиж байгаа хэрэг биш юм. Үзэгчид Даваа, Мягмар, Пүрэв, Баасан гарагуудад шинэ дугааруудыг Twitch, YouTube болон бусад подкаст сувгуудаар хүлээн авч үзэх боломжтой бөгөөд Twitch нь Google-ийн видео платформыг орлох бус, харин шууд дамжуулалтын өөр нэгэн нэмэлт суваг болж байна.
Яагаад заавал Twitch гэж?
Twitch платформ нь подкастаар тийм ч баялаг биш бөгөөд тус платформын «Talk Shows & Podcasts» ангилал нь нийт шууд дамжуулалт үзэгчдийн 1 хувьд ч хүрдэггүй байна. Гэсэн хэдий ч Twitch нь залуу үзэгчид болон шууд оролцоонд суурилсан үзэх боломжийг олгодог. Үзэгчдийнх нь бараг 70 хувь нь 18-аас 34 насныхан байдаг нь спорт болон бооцооны сэдэвтэй шоунд маш сайн тохирч байгаа юм. Спорт бооцооны шоу нь шууд эфирийн үеэр шуурхай мэдээнд хариу үйлдэл үзүүлэх, бооцооны таамаг дэвшүүлэх, чат дахь үзэгчдээс чиглэл авах зэргээр ажиллах боломжтой.
Spotify-ын түншлэл болон шинэ санаачилга хариуцсан захирал Ноа Малале The Ankler-т өгсөн ярилцлагадаа Spotify нь үргэлж «фэнүүд хаана байна, тэнд хүрч ажиллахыг» хүсдэг хэмээгээд Билл Симмонс болон The Ringer нь шинэ медиагийн тэргүүн эгнээнд байхыг эрмэлзсээр ирснийг тэмдэглэжээ.
Бусад жишээнүүд
The Ringer нь ярианы нэвтрүүлэгт зориулж Twitch-ийг ашиглаж буй анхны компани биш юм. Twitch нь 2021 онд спорт подкаст, ярианы шоу, хамт үзэх шууд дамжуулалт зэрэгт зориулан «Sports Accelerator Program»-ыг эхлүүлж байв. Мөн ESPN-ийн зарим радио салбарууд тус платформ дээр цацагддаг бөгөөд жүжигчин Кеке Палмер энэ оны эхээр «Keke Live» ярианы шоугаа эхлүүлсэн. Түүнчлэн Нью-Йорк хотын дарга Зоран Мамдани өөрийн «Talk With the People» цуврал нэвтрүүлгийн интерактив төв болгон Twitch-ийг ашигладаг байна. Мамданигийн шоу олон платформ дээр зэрэг цацагддаг ч үзэгчдийн асуултыг Twitch-ийн чатаар дамжуулан авдаг ажээ.
Эдгээр жишээнүүд нь Twitch подкаст бүтээгчиддээ юу санал болгож чадахыг харуулж байна. Энэ нь дугаараа шууд бичих, үзэгчидтэй бодит цаг хугацаанд харилцах, шинэ фэнүүдийн хүрээллийг бий болгох боломж бөгөөд үүний дараа бэлэн болсон шоугаа YouTube, Spotify болон уламжлалт подкаст сувгуудаар түгээдэг байна.
