АНУ-ын алдартай бургерын сүлжээ Steak 'n Shake долдугаар сард ижил төрлийн ресторануудын борлуулалт 16 орчим хувиар өссөн гэж мэдэгдлээ. Тус компани энэхүү өсөлтийг өөрийн үнэнч хэрэглэгчид болон Bitcoin эзэмшигчидтэй холбон тайлбарлаж байна.
PR үү, эсвэл бодит хэрэглээ юу?
Steak 'n Shake сүлжээ 2025 оны тавдугаар сараас эхлэн АНУ-д Bitcoin-оор төлбөр хүлээн авч эхэлсэн юм. Тус компанийн зүгээс Bitcoin-оор төлбөр хийх нь зээлийн картаас хямд бөгөөд хэмнэсэн мөнгөө эрүүл орц найрлагад зарцуулж байгаа гэж мэдэгджээ. Гэсэн хэдий ч, тус сүлжээ Bitcoin-оор төлбөр хийсэн нийт хэрэглэгчдийн тоо, гүйлгээний дүн болон нийт захиалгад эзлэх хувийг одоог хүртэл ил тод зарлаагүй байна.
Үүний улмаас борлуулалтын өсөлт нь Bitcoin-ын нөлөө мөн эсэх, эсвэл үнийн өөрчлөлт, сурталчилгааны аян, цэсийн шинэчлэл зэрэг бусад хүчин зүйлээс шалтгаалсан эсэхийг ялгаж салгах боломжгүй байгаа юм. Компани өөрийн цахим хуудсаараа дамжуулан Bitcoin-ын хүчинд эргэлзэгсдийг буруу зүйл хийж байна хэмээн мэдэгдсэн ч, бодит тоон үзүүлэлтүүд дутагдалтай хэвээр байна.
Санхүүгийн үр ашиг ба цаашдын төлөв
Bitcoin 2026 бага хурлын үеэр Steak 'n Shake-ийн гүйцэтгэх захирал Майкл Боес Bitcoin-ын гүйлгээ нь уламжлалт карттай харьцуулахад 50 орчим хувиар бага зардалтай болохыг дурдсан. Хэрэв бүх хэрэглэгч Bitcoin-д шилжвэл жилд 6 сая доллар хэмнэх боломжтой гэж тэрээр үзэж байна. Мөн Bitcoin-ыг стратегийн нөөцөд нэмж байгаагаа мэдэгдсэн.
Гэвч тус компанийн эцэг компани болох Biglari Holdings-ийн тайлангаас харахад, борлуулалтын өсөлт нь Bitcoin-ыг нэвтрүүлэхээс өмнө буюу оны эхний улирлаас эхлэн ажиглагдаж байжээ. Одоогоор Steak 'n Shake-ийн зүгээс Bitcoin-ын төлбөрийн хэрэглээний талаарх дэлгэрэнгүй дата мэдээллийг гаргаагүй байгаа нь уг төлбөрийн хэрэгсэл борлуулалтад хэрхэн нөлөөлж байгааг үнэлэхэд хүндрэл учруулж байна.
