Австралийн алдарт Tame Impala хамтлаг "triple j" радиогийн "Like A Version" нэвтрүүлэгт оролцож, дуучин Силийн (Seal) 1994 оны хит "Kiss From a Rose" дууг синтоор баяжуулан шинэчлэн дуулжээ. Тэд мөн өөрсдийн "Dracula" дууныхаа хураангуй хувилбарыг толилуулсан байна.
Хамтлагийн ахлагч Кевин Паркерын хувьд энэхүү ковер дуу нь түүний дурсамж руу буцсан явдал болжээ. Тэрбээр уг дууг анх өөрийн худалдаж авч байсан "Batman Forever" киноны дууны цомог (CD)-оос сонсож байснаа хуваалцсан бөгөөд уг цомгоор дамжуулан U2, The Flaming Lips, Ник Кэйв зэрэг уран бүтээлчидтэй танилцаж байсан аж.
Энэ нь Tame Impala төслийн "Like A Version" цувралд хийсэн дөрөв дэх ковер болж байгаа юм. Тэд өмнө нь OutKast хамтлагийн "Prototype" (2013), Кайли Миноугийн "Confide in Me" (2015), Эдвин Коллинзийн "A Girl Like You" (2021) дуунуудыг шинэчлэн дуулж байв.
Тус хамтлагийн хувьд энэ жил карьерынх нь хамгийн өндөр амжилттай жил болж байна. 2025 оны аравдугаар сард анх бие даасан сингл хэлбэрээр цацагдсан "Dracula" дуу нь хоёрдугаар сард Jennie-гийн хамтарсан ремикс хувилбар гарсны дараа эрчээ авч, Billboard Hot 100 чартын 5-р байранд хүрснээр тэдний уг чартын эхний 10-т багтсан анхны дуу болжээ. Мөн "Pop Airplay", "Hot Rock & Alternative Songs" чартуудыг тэргүүлж, "Hot Dance/Electronic Songs" чартыг зургаагаас олон сар манлайлсан байна.
Үүнээс гадна тэдний "Deadbeat" цомог ирэх сард болох ARIA Awards-аас нийт найман номинацид нэр дэвшиж, Genesis Owusu-тай зэрэгцэн тэргүүлж байгаа аж. Tame Impala хамтлаг Австрали дахь тоглолтуудаа өндөрлүүлээд байгаа бөгөөд 2027 оны тавдугаар сард Их Британи болон Европын орнуудаар аялан тоглолтоо үргэлжлүүлэхээр төлөвлөжээ.
