Дэлхийн хамгийн том сошиал медиа платформуудын нэг TikTok Нэшвилл хотын "Moore" барилгад байрлах оффисоо хааж, тус салбарт ажиллаж байсан бүх ажилтнаа цомхотгосон талаар "The Tennessean" сонин мэдээллээ.
TikTok USDS Joint Venture-ийн төлөөлөгчийн мэдэгдснээр, энэхүү шийдвэр нь үйл ажиллагаагаа илүү оновчтой болгох, багуудын ажлыг урт хугацааны өсөлтөд чиглүүлэх зорилготой аж. Тус компани нь TikTok-ийг бүтээлчээр ашигладаг, өөрийн дуртай зүйлсээ бусадтай хуваалцдаг 200 сая америк хэрэглэгчдэдээ аюулгүй, эерэг туршлага олгох амлалтдаа үнэнч хэвээр үлдэнэ гэдгээ илэрхийлжээ.
TikTok нь Нэшвилл дэх оффисынхоо түрээсийн гэрээг ердөө хоёр жилийн өмнө байгуулж байсан юм. Тус компани 2021 оноос хойш Нэшвилл хотын төвд байрлах "WeWork" оффист үйл ажиллагаагаа явуулж байгаад 2024 онд одоогийн байршил руугаа нүүсэн түүхтэй. Одоогоор Нэшвилл дэх оффист нийт хэдэн хүн ажиллаж байсан нь тодорхойгүй байна.
Сүүлийн үед TikTok болон түүний толгой компани ByteDance нь хөгжмийн салбарт томоохон өөрчлөлтүүдийг хийж байна. Тухайлбал, өнгөрсөн аравдугаар сард АНУ болон Латин Америкийн хөгжмийн хэлтэст ажиллаж байсан 15 орчим ажилтныг цомхотгосон юм. Үүнд хөгжимтэй холбоотой түншлэл болон программчлалын багийн үүрэгт ажлууд багтжээ. Мөн Их Британи дахь оффисын зарим ажилтнуудад ажлаас халагдсан тухай мэдэгдэл хүргүүлсэн байна. Энэхүү цомхотгол нь 2023 онд үр ашгийг нэмэгдүүлэх зорилгоор уран бүтээлчдэд үйлчлэх багийн долоон ажилтныг халснаас хойшхи хөгжмийн хэлтсийн томоохон өөрчлөлтүүдийн нэг боллоо.
Sprout Social-ийн мэдээлснээр, TikTok 2025 онд АНУ-д 136 сая хэрэглэгчтэй байжээ. "Billboard" сэтгүүл Нэшвилл дэх оффисын хаалтын талаар тодруулга авахаар TikTok-ийн төлөөлөгчтэй холбогдсон байна.
