Технологийн салбарт санах ойн чипний хомсдол үргэлжилсээр байгаа энэ үед Windows үйлдлийн системтэй зөөврийн компьютер хэрэглэгчдэд дахин нэг таагүй мэдээ дуулдаж эхэллээ. Тайванийн өдөр тутмын «United Daily News» (UDN) сонины мэдээлснээр, Майкрософт (Microsoft) компани төхөөрөмж үйлдвэрлэгчдэд зориулсан Windows 11 үйлдлийн системийн лицензийн хураамжаа нэмэгдүүлж байгаа аж. Энэхүү шийдвэр нь хувийн компьютерүүдийн (PC) үнийг улам бүр өсгөх магадлалтай байна.
Нэрээ нууцалсан нэгэн PC брэндийн удирдах ажилтан UDN сонинд өгсөн ярилцлагадаа Майкрософт компани жил бүр үйлдвэрлэгчдэд зориулсан лицензийн төлбөрөө бага зэрэг нэмдэг байсан бол энэ удаагийн өсөлт нь ердийнхөөс хамаагүй өндөр байгааг онцолжээ. Өмнө нь лицензийн хураамж жил бүр ихэвчлэн нэг оронтой тоогоор нэмэгддэг байсан бол энэ оны 7-р сараас эхлэн дундаж өсөлт 7-оос 10 хувьд хүрсэн гэж тус сонин бичсэн байна.
Хүчин чадлаас хамаарсан үнийн өсөлт
Сонины сурвалжилсан бусад брэндийн удирдлагуудын тэмдэглэснээр, лицензийн төлбөрийн өсөлт нь процессорын төрлөөс хамаарч өөр өөр байгаа аж. Тодруулбал, илүү өндөр үзүүлэлттэй, хүчин чадал сайтай CPU-тэй төхөөрөмжүүдийн лицензийн үнэ бага үзүүлэлттэй загваруудтай харьцуулахад илүү өндөр хувиар өссөн байна.
Эдгээр өөрчлөлтүүд нь одоогийн PC-ийн үнэд аль хэдийн нөлөөлж эхлээд байгааг UDN-ийн эх сурвалжууд мэдээлэв. Хэрэглэгчдийн гар дээр очдог ихэнх Windows зөөврийн болон суурин компьютерүүд үйлдлийн систем нь урьдчилан суурилуулагдсан ирдэг тул энэ нь үнэд шууд нөлөөлөх нь зүй ёсны хэрэг юм. Харин өөрсдөө компьютер угсардаг (DIY) хүмүүсийн хувьд Windows 11-ийн бие даасан лицензийн үнэ өөрчлөгдөөгүй хэвээр үлдсэн байна.
Энэхүү мэдээллийн талаар «Mashable» технологийн мэдээллийн сайт Майкрософт компаниас тодруулахад, тус компанийн төлөөлөгч одоогоор хуваалцах мэдээлэл байхгүй гэсэн хариулт өгчээ.
Техник хангамж ба программ хангамжийн давхар дарамт
Хэрэв UDN сонины тайлан үнэн бол компьютер үйлдвэрлэгчид программ хангамж болон техник хангамжийн аль алиных нь хувьд урьд өмнө байгаагүй санхүүгийн хүнд сорилттой тулгарч байна.
Хиймэл оюун ухааны (AI) огцом өсөлтөөс шалтгаалж RAM болон SSD санах ойн чип зэрэг компьютерын физик эд ангиудын хомсдол үүсээд байгаа юм. Үүнээс үүдэн Dell, Framework болон Майкрософт зэрэг брэндүүд сүүлийн саруудад зөөврийн компьютерынхоо үнийг нэмэхэд хүрээд байна. Зарим шинжээчид «RAMageddon» хэмээн нэрлэгдээд буй энэхүү хямрал энэ оны сүүл болон ирэх онд ч үргэлжлэн дордох магадлалтай гэж таамаглаж байна.
