Хиймэл оюун ухааны загварууд програм хангамжийн сул талыг хайж олох, тэдгээрийг ашиглах арга замыг боловсруулах, тэр байтугай бие даан хакердах ажиллагаа явуулах чадвартай болж байна. Үүний нэг тодорхой жишээг дижитал хамгаалалтын A Security компанийн судлаачид мягмар гарагт танилцуулж, видео хурлын Zoom платформоос байны төхөөрөмжийг алсаас хянах боломжтой эмзэг байдлыг илрүүлснээ зарлалаа.
Судлаачдын үзэж буйгаар, Zoom-ийг хүмүүс ашиглахдаа аюулгүй гэж итгэдэг бөгөөд үүнийг заналхийлэл гэж хардаггүй тул энэ нь чухал бай болдог байна. Халдлагын үед дэлгэц хуваалцсан дуудлагад оролцож буй хэн ч бай (хурлыг зохион байгуулагч эсвэл оролцогчдын аль нь ч байсан) хохирогчид ямар нэгэн шинж тэмдэг илрэхгүй, ямар нэгэн үйлдэл хийх шаардлагагүйгээр чимээгүй халдлагад өртөх боломжтой байжээ.
Хиймэл оюун ухаанаар илрүүлсэн сул тал
A Security компанийн хамтран үүсгэн байгуулагч Омер Гул WIRED сэтгүүлд өгсөн ярилцлагадаа "Бидний хувьд хамгийн сонирхолтой бөгөөд аюултай гэж үзэж байгаа зүйл бол эдгээр чадавх хүн бүрд нээлттэй болж, нэвтрэх зааг хурдацтай буурч байгаа явдал юм" хэмээн онцолжээ. Түүний хэлснээр өмнө нь ийм сул талыг олж илрүүлэхийн тулд таван хүнтэй баг маш их сайжруулалт, давталт хийж, магадгүй зургаан сарын хугацаа зарцуулдаг байсан бол одоо хүмүүс 20 хүрэхгүй зааварчилгаа буюу prompt ашиглан ижил үр дүнд хүрэх боломжтой болсон байна.
Энэхүү сул талыг олон нийтэд нээлттэй байдаг хиймэл оюун ухааны загваруудыг ашиглан зургаадугаар сарын эхээр илрүүлсэн бөгөөд ажилладаг халдлагын хувилбарыг бүтээхэд 20-иос цөөн зааварчилгаа шаардагджээ.
Zoom компаниас авсан арга хэмжээ
Zoom компани мягмар гарагт аюулгүй байдлын зөвлөмж гаргаж, уг алдааг засах шинэчлэлтүүдийг хэдийнэ нэвтрүүлж эхэлсэн тухайгаа мэдээлсэн байна. Тус эмзэг байдал нь Zoom-ийн дэмждэг бүх үйлдлийн системүүд болох Windows, macOS, Linux, iOS, болон Android дээр ажилладаг төхөөрөмжүүдэд нөлөөлөхөөр байжээ.
