Америкийн дуучин, Queen хамтлагийн гоцлол дуучин Адам Ламберт шинэ цомгоо гаргахаар болсноо зарлалаа. Түүний зургаа дахь цомог нь “Adam” нэртэй бөгөөд долдугаар сарын 10-нд худалдаанд гарах юм байна. Энэхүү цомог нь Ламбертын өөрийн үүсгэн байгуулсан FCL Records хэмээх бие даасан студиэр дамжуулан гарах ажээ.
Цомгийн нээлтийн сингл нь “Eat U Alive” нэртэй бөгөөд цус сорогчийн сэдэвтэй, сонирхолтой поп дуу болсон байна. Ламберт энэ дуугаараа өөрийн фэнүүддээ гэнэтийн бэлэг барьж, шинэ цомгийн хүлээлтийг улам өндөрсгөж байгаа бололтой.
Адам Ламберт Queen хамтлагтай хамтран ажиллаж, дэлхий даяар тоглолт хийж байгаагаараа Монголын залуучуудад илүү танигдсан байх. Тэрээр мөн бие даасан уран бүтээлээ тууштай хийдэг бөгөөд хэд хэдэн амжилттай цомог гаргасан билээ. Түүний шинэ цомог ямар болохыг тэсэн ядан хүлээцгээе!
