Сүүлийн үед крипто зах зээлд HYPE, JTO, WLD зэрэг токенуудын үнэ огцом өсөж, хөрөнгө оруулагчдын анхаарлыг татаад байна. Тухайлбал, хиймэл оюун ухааны төсөл болох Worldcoin (WLD) сүүлийн нэг сарын хугацаанд 149.6 хувиар, JTO 46.7 хувиар, харин HYPE токен 6-р сарын 16-нд 77 ам.долларын түүхэн дээд цэгтээ хүрчээ. Энэхүү өсөлтийг олон хүн "альткойны улирал" (altcoin season) эхэлж байна хэмээн таамаглаж байгаа ч шинжээчид илүү болгоомжтой байхыг зөвлөж байна.
CryptoSlate-ийн мэдээлснээр, эдгээр токенуудын гайхалтай амжилт нь зах зээлийн ерөнхий хандлагыг бүрэн илэрхийлж чадахгүй байна. Биткойн, Этериум болон стейблкойнуудыг (тогтвортой ханштай койнууд) хассан альткойны зах зээлийн давамгайлал сүүлийн нэг сарын хугацаанд 21.41 хувиас 21.16 хувь болж буурчээ. Энэ нь зах зээлийн нийт хөрөнгө оруулалт альткойнууд руу биш, харин голчлон Биткойн эсвэл бусад том төслүүд рүү чиглэсэн хэвээр байгааг харуулж байна.
Зах зээлийн шинжээчдийн үзэж байгаагаар, WLD болон JTO зэрэг токенуудын өсөлт нь тухайн төслүүдийн онцлог үйл явдал эсвэл түр зуурын хөөсрөл байх магадлалтай. Хэрэв жинхэнэ "альткойны улирал" эхэлсэн бол зах зээлийн нийт үнэлгээнд эзлэх альткойнуудын хувь хэмжээ тогтвортой өсөх ёстой байдаг. Гэвч одоогийн нөхцөл байдал нь зөвхөн зарим нэг "азтай" төслүүд л онцгойрч байгааг илтгэж байна.
Тиймээс залуу хөрөнгө оруулагчид маань олон нийтийн сүлжээгээр тархаж буй хэт өөдрөг мэдээлэлд автахгүй байхыг зөвлөж байна. Крипто зах зээл нь маш тогтворгүй бөгөөд хэдхэн токенын өсөлтөөр бүхэл бүтэн салбарын чиг хандлагыг дүгнэх нь эрсдэлтэй. Хөрөнгө оруулалт хийхдээ тухайн төслийн суурь судалгааг сайтар хийж, зах зээлийн ерөнхий дүр зурагтай харьцуулан шийдвэр гаргах нь зүйтэй.
