АНУ-ын Нью-Йорк болон Нью-Жерси мужийн прокурорууд 2026 онд болох Хөлбөмбөгийн Дэлхийн Аварга Шалгаруулах Тэмцээний (ДАШТ) тасалбарын үнийн асуудлаар FIFA-г шалгаж эхэлжээ. Прокурорууд тасалбарын үнэ “тэнгэрт хадсан” хэмээн үзэж, энэ нь орон нутгийн оршин суугчид болон жуулчдыг мөлжих оролдлого гэж үзэж байна.
Нью-Жерси мужийн прокурор Филип Селлингер мэдэгдэл хийхдээ “Дэлхийн Аварга Шалгаруулах Тэмцээн бол манай оршин суугчид болон зочдыг мөлжих урилга биш” гэжээ. Тэрээр FIFA-г хууль бус үйлдэл хийсэн байж болзошгүй гэж үзэж байгаагаа илэрхийлсэн байна.
Шалгалтын хүрээнд FIFA-д албан бичиг хүргүүлж, тасалбарын үнийн талаар дэлгэрэнгүй мэдээлэл өгөхийг шаарджээ. Мөн тасалбарын үнийг тогтоохдоо ямар зарчим баримталсан, хэрхэн хуваарилсан зэрэг асуудлыг тодруулахыг хүссэн байна. FIFA-гийн зүгээс энэ асуудалд ямар нэгэн тайлбар хийгээгүй байна.
2026 оны ДАШТ АНУ, Канад, Мексик улсуудад хамтран зохион байгуулагдах бөгөөд хөлбөмбөгийн фанатуудын дунд маш их хүлээлт үүсгээд байгаа билээ. Гэвч тасалбарын үнэ хэт өндөр байгаа нь олон нийтийн дургүйцлийг хүргэж, шүүмжлэл дагуулаад байна. Энэхүү шалгалт нь шударга бус үнийн өсөлтийг таслан зогсоож, хөлбөмбөг сонирхогчид боломжийн үнээр ДАШТ-ийг үзэх боломжийг бүрдүүлэх зорилготой юм.
