Бүгд Найрамдах Ардчилсан Конго Улсад (БНАКУ) хүмүүнлэгийн ажил эрхэлж байсан АНУ-ын нэгэн иргэнээс эбола вирус илэрсэн нь тогтоогдлоо. Энэ нь тус улсад дэгдээд буй вирусийн улмаас халдвар авсан хоёр дахь америк иргэн болж байна. Өмнөх тохиолдлын нэгэн адил тус иргэнийг АНУ-д бус, Герман улс руу эмчилгээ хийлгэхээр илгээжээ.
Тавдугаар сарын 15-нд албан ёсоор зарлагдсан энэхүү дэгдэлт нь түүхэн дэх гурав дахь том дэгдэлт гэж бүртгэгдээд байгаа бөгөөд халдварын тархалт үргэлжилсээр байна. Долдугаар сарын 12-ны байдлаар БНАКУ-д 1,926 тохиолдол бүртгэгдэж, 702 хүн нас баржээ. Энэ удаагийн дэгдэлт нь эбола вирусийн төрлүүдээс харьцангуй бага танигдсан Bundibugyo омог-оор үүсгэгдсэн байна.
АНУ-ын засаг захиргаа тус улсад халдвар авсан эсвэл өртөж болзошгүй иргэдээ эх оронд нь буцаан авчрахыг хориглож, зорчих хөдөлгөөнд хатуу хязгаарлалт тогтоосон байна. Тус улсын зүгээс баримталж буй энэхүү тусгаарлах бодлого нь олон нийтийн дунд маргаан дагуулаад байгаа юм. Уг нь АНУ-д эбола вирусийн халдвар авсан өвчтөнүүдийг аюулгүй нөхцөлд хянах, өндөр түвшний тусламж үйлчилгээ үзүүлэх зориулалттай олон тооны байгууламж байдаг хэдий ч эрх баригчид ийнхүү хатуу байр суурь баримталсаар байна.
