1960-аад оны алдарт "Бэтмен" цувралд "Муур эмэгтэй" (Catwoman)-ийн дүрийг бүтээж, дэлхий дахинд танигдсан Америкийн домогт жүжигчин Жули Ньюмар саяхан өгсөн ярилцлагадаа Холливудын удирдлагын талаар маргаантай байр суурь илэрхийлжээ.
Өдгөө 91 настай жүжигчин бүсгүй кино урлагийн салбарт эрчүүд илүү давуу талтай бөгөөд тэднийг удирдах албан тушаалд байх нь зөв гэсэн утгатай зүйл ярьсан нь цахим орчинд хүчтэй шүүмжлэлийг дагуулаад байна. Ньюмар "Эрчүүд эмэгтэйчүүдэд маш сайн ханддаг учраас энэ систем маш сайн ажилладаг" хэмээн өөрийн байр сууриа тайлбарлажээ. Тэрээр Холливудын бүтээлч үйл явцыг эрчүүд илүү сайн удирдаж чаддаг гэсэн утгатай санааг илэрхийлсэн нь өнөөгийн тэгш эрхийн төлөөх тэмцэл өрнөж буй Холливудын нийгэмлэгт ихээхэн эгдүүцлийг төрүүлээд байна.
Түүний энэхүү мэдэгдлийн дараа олон нийтийн сүлжээнд түүнийг хуучирсан сэтгэлгээтэй хэмээн шүүмжлэх хүмүүс олширсон бол зарим нь түүний үеийнхний үзэл бодол ийм байх нь аргагүй хэмээн өмгөөлөх талтай байна. Гэсэн хэдий ч эмэгтэйчүүдийн эрх, жендерийн тэгш байдлын төлөөх хөдөлгөөн хүчтэй өрнөж буй өнөө цагт Ньюмарын энэ үг кино урлагийн салбарынхны дунд томоохон маргаан дэгдээгээд байгаа юм.
Жули Ньюмар нь 1960-аад оны үеийн поп соёлын бэлгэдэл болсон жүжигчин бөгөөд түүнийг анхны "Муур эмэгтэй" гэдгээр нь олон үеийн үзэгчид мэддэг билээ. Түүний энэ удаагийн байр суурь нь Холливуд дахь эрх мэдлийн хуваарилалт болон жендерийн тэнцвэрт байдлын асуудлыг дахин нэг удаа хурцаар хөндөж байна.
