Өнгөрсөн зун кино ертөнцийг доргиосон "Барбенхаймер" (Barbenheimer) үзэгдэл дахин давтагдах нь ээ. Энэ удаад кино театрт биш, харин видео тоглоомын ертөнцөд томоохон тулаан өрнөхөөр зэхэж байна. Тодруулбал, дэлхий даяар сая сая тоглогчдын хүсэн хүлээж буй Rockstar Games-ийн бүтээл "GTA 6" болон алдартай Barbie брэндийн шинэ тоглоом "Barbie Rewind" энэ оны 11 дүгээр сард зэрэг худалдаанд гарахаар товлогджээ.
"GTA 6" буюу Grand Theft Auto 6 нь гэмт хэргийн ертөнцийн нээлттэй орчин бүхий, дэлхийн хамгийн алдартай тоглоомуудын нэг юм. Харин "Barbie Rewind" бол Mattel компанийн алдарт хүүхэлдэйн дүр дээр суурилсан, илүү хөнгөн, хөгжилтэй өнгө аястай тоглоом юм. Энэ хоёр бүтээл нь жанрын хувьд эрс тэс ялгаатай ч, нэгэн зэрэг нээлтээ хийж байгаа нь сошиал медиа хэрэглэгчдийн анхаарлыг татаж эхэллээ.
Интернет хэрэглэгчид энэхүү үйл явдлыг 2023 оны "Barbie" болон "Oppenheimer" кинонууд зэрэг гарч байсан үетэй зүйрлэн "Барбенхаймер 2" хэмээн нэрлэж байна. Хэдийгээр Rockstar Games болон Mattel-ийн тоглоомууд өөр өөр зорилтот бүлэгт чиглэдэг ч, нэг сард хоёр том брэнд өрсөлдөх нь тоглоомын зах зээлд томоохон шуугиан тарих нь гарцаагүй юм.
Одоогоор 11 дүгээр сард өөр томоохон тоглоомууд нээлтээ хийхээр төлөвлөөгүй байгаа нь энэ хоёр бүтээл зах зээлийг бүрэн эзлэх боломжийг олгож байна. Тоглоом сонирхогчид аль хэдийнээ өөрсдийн сонголтоо хийж, сошиал сүлжээнд хөгжилтэй меменүүдийг хуваалцаж эхэлжээ. Таны хувьд гэмт хэргийн ертөнцөөр аялах уу, эсвэл Барбигийн өнгөлөг ертөнцийг сонгох уу?
