АНУ-ын нээлттэй тэмцээний шигшээд шалгарснаас хойш Америкийн теннисчин Бен Шелтон дөрвөн тоглолтынхоо гуравт нь ялагдал хүлээгээд байна. Есдүгээр сарын дундуур болсон Дэвисийн цомын хоёр тоглолтдоо дараалан хожигдсон дэлхийн чансааны дөрөвдүгээр байрын тамирчин Шанхайн Мастерс тэмцээнд ганцхан хожил авч, гуравдугаар шатнаас тэмцээнээ дуусгалаа.
Шелтоныг ялсан Францын 21 настай тамирчин Артур Жеагийн хувьд энэ нь карьерынх нь томоохон амжилт болж байна. Тэрбээр дэлхийн шилдэг 10-т багтдаг тамирчныг анх удаа буулган авсан нь энэ юм. Тоглолтын дараа Жеа "Сүүлийн хэдэн долоо хоног гайхалтай байлаа. Би тоглолтоо маш их өөрчилсөн, талбай дээр өөртөө илүү итгэлтэй болсон" хэмээн ярьжээ.
Эхний сэтэд Жеа 5-4 харьцаатай давуулах боломжоо алдаж, Шелтон оноог 5-5 болгон тэнцүүлсэн ч тай-брейкт 6-5 онооны үед Жеа оноо авснаар эхний сэтийг өөрийн болгосон юм. Хоёрдугаар сэтэд Шелтон 4-3 болгон тэргүүлсэн ч Жеа дараагийн тоглолтод нь хариу оноо авч, улмаар хоёр дахь сэтийн тай-брейкт хожиж тоглолтыг өндөрлүүлжээ. Франц эр тоглолтын турш өрсөлдөгчийнхөө давуулалтыг гурван удаа тасалсан байна.
Өдгөө чансааны 48-д эрэмбэлэгдэж буй Артур Жеа дөрөвдүгээр шатанд Франсиско Серундоло эсвэл Якуб Меншик нарын аль нэгтэй нь тоглох хуваарьтай байна. Харин Шелтон уг ялагдлыг ардаа орхиж, танхимын улирлын тоглолтууддаа амжилттай оролцон ATP Finals-д оролцох эрхийн төлөө үргэлжлүүлэн өрсөлдөх зорилготой байна.
