NBA-ийн ирээдүйтэй залуу од, Сан-Антонио Спёрс багийн төвийн тоглогч Виктор Вембаньямагийн эргэн тойронд таагүй үйл явдал боллоо. Цуврал тоглолтын дөрөв дэх өдөр Сан-Антонио Спёрс баг Нью-Йорк Никс багт хожигдсоны дараа Вембаньямаг багийнхаа зочид буудал руу орох үед нь үл таних этгээд өндөг шидэж, түүнийг оносон байна.
Франц гаралтай, 224 см өндөр Вембаньяма нь өдгөө дэлхийн сагсан бөмбөгийн ертөнцийн хамгийн том оддын нэгд тооцогддог. Түүнийг ийнхүү гудамжинд халдлагад өртсөн нь шүтэн бишрэгчдийн зан төлөв, ялангуяа тоглолтын дараах сөрөг хандлага хэрээс хэтэрч байгааг харууллаа. Сүүлийн үед Нью-Йорк Никс багийн гайхамшигтай эргэн ирэлт, цувралын үр дүнгийн дараа фанатуудын дунд ширүүн маргаан, үл ойлголцол ихсэж байгаа нь иймэрхүү таагүй үйл явдлуудад хүргэж байна гэж спортын шинжээчид үзэж байна.
Одоогоор энэ хэргийн талаар цагдаагийн байгууллагаас албан ёсны мэдээлэл өгөөгүй байгаа бөгөөд Вембаньямагийн биед гэмтэл учраагүй боловч энэ нь спортын ертөнцөд тоглогчдын аюулгүй байдлын асуудлыг дахин хөндөхөд хүргэлээ. Олон нийтийн сүлжээгээр фанатууд энэ үйлдлийг эрс буруушааж, тамирчдыг хүндэтгэх ёстой гэсэн байр суурийг илэрхийлсээр байна.
Спортын талбайд өрсөлдөх нь нэг хэрэг, харин тамирчдын хувийн орон зай, аюулгүй байдалд халдсан энэ мэт бүдүүлэг үйлдэл нь сагсан бөмбөгийн соёлыг гутааж байгаа явдал юм.
