Дуучин Грейси Абрамс болон продюсер Аарон Десснер нар хамтран гурван цомог гаргаад байгаа бөгөөд тэдний хамтын бүтээл болох "Daughter From Hell" цомог долдугаар сарын 17-нд олны хүртээл болсон билээ. Гэвч тус цомогт багтсан "Death Wish" дууны үг Тейлор Свифтийн тухай бичигдсэн гэх цуу яриа цахим орчинд хүчтэй тархаад байв.
Энэхүү таамаглал нь дууны үгэнд гардаг "Чиний сая сая нарнаас ч хурц гэрэл хүмүүсийг түлж байна" гэх мэт хурц үгстэй холбоотой байсан юм. Хэдийгээр Грейси Абрамс энэ дуугаа өөрийн найзынх нь нарциссист зан чанартай хуучин найз залуугийн тухай бичсэн гэдгээ өмнө нь мэдэгдэж байсан ч сонсогчдын дунд эргэлзээ байсаар байв.
Саяхан Billboard сайтад өгсөн ярилцлагадаа Аарон Десснер энэ асуудлыг эцэслэхээр шийджээ. Тэрээр "Энэ дууг Тейлор Свифтийн тухай гэх яриа гарсан байна. Үгүй, энэ бол огт тийм биш" хэмээн тодорхой мэдэгдсэн байна.
Мөн сонсогчид "Death Wish" дууны студийн хувилбар болон Грейси Абрамсын аялан тоглолтын үеэр дуулсан төгөлдөр хуурын хувилбар өөр сонсогдож байгаад гайхаж, тэднийг эх хувилбараа өөрчилсөн гэж үзэж байсан юм. Десснер үүнийг тайлбарлахдаа, студийн хувилбар нь бүр өмнө нь бичигдсэн бөгөөд тэд ямар нэгэн өөрчлөлт хийгээгүй болохыг онцлов. Тэрээр Грейси Абрамстай зургаан жил гаруй хугацаанд хамтран ажиллаж байгаа бөгөөд тэдний уран бүтээлийн харилцаа болон дууны сэдвийн талаарх ойлголтоо ч хуваалцсан байна.
