Австрали гаралтай Америкийн рэппер, дуучин Игги Азалия (Iggy Azalea) нь “Mother Iggy” нэртэй мемекоин гаргаснаараа олны анхаарлыг татсан билээ. Мемекоин гэдэг нь ихэвчлэн онлайн хошигнол эсвэл соёлын үзэгдлээс санаа авсан, ямар нэгэн бодит үнэ цэнэгүй криптовалютыг хэлдэг. “Mother Iggy”-ийн хувьд ч мөн адил, ямар нэгэн тодорхой зорилгогүй, зөвхөн цахим ертөнцөд шуугиан тарих зорилготой байсан бололтой.
Гэвч саяхан тус койныг худалдан авсан хүмүүсээс бүрдсэн нэгэн бүлэг Игги Азалияг шүүхэд өгөхөөр болжээ. Тэдний гол үндэслэл нь Игги Азалия койныг сурталчилж байхдаа амласан хэрэглээ болон бизнесийн хамтын ажиллагаагаа хэрэгжүүлээгүй явдал юм. Өөрөөр хэлбэл, хэрэглэгчид койныг худалдан авснаар ямар нэгэн бодит ашиг хүртэхгүй байгааг онцолж байна.
Нэхэмжлэгчдийн зүгээс Игги Азалияг койны үнийг зохиомлоор өсгөж, улмаар өөрийн ашгийг нэмэгдүүлсэн хэмээн буруутгаж байгаа бөгөөд энэ нь хэрэглэгчдийг хохироосон гэж үзэж байна. Хэрэв уг хэрэг шүүхээр шийдвэрлэгдвэл Игги Азалияд томоохон хэмжээний торгууль ногдуулж болзошгүй юм.
Энэхүү хэрэг нь мемекойны зах зээл дээрх эрсдэлийг дахин сануулж байна. Залуус та бүхэн ямар нэгэн криптовалютад хөрөнгө оруулахаасаа өмнө сайтар судлах, зөвхөн шуугианд автаж, бодит үнэ цэнэгүй койнуудаас болгоомжлох хэрэгтэй. Игги Азалиягийн хэрэг нь цаашид олон алдартнууд криптовалютын зах зээлд хэрхэн оролцох талаар томоохон сургамж болж үлдэх болов уу.
