Индонез улс хагас боловсруулсан никелийн бүтээгдэхүүн үйлдвэрлэх хайлуулах үйлдвэрүүдийн бүтээн байгуулалтыг түр зогсоох боломжийг судалж байгаа талаар тус улсын төрийн өмчит Antara агентлаг мэдээллээ. Энэ тухай тус улсын Эрчим хүч, эрдэс баялгийн сайд Бахлил Лахадалиагийн мэдэгдлээс эш татан уламжилсан байна.
Дэлхийн зах зээл дэх нийлүүлэлтийн илүүдэл түүхий эдийн үнийг бууруулаад байгаа энэ үед Индонез улс дээрх алхмыг авч хэрэгжүүлэхээр хэлэлцэж байгаа юм. Хэрэв тус улс дэлхийн хэт үйлдвэрлэлийг хязгаарлах болон эрдэс баялгийн өргөн салбар дахь дотоодын үйлдвэрлэлээ хамгаалах зорилгоор шинэ хайлуулах үйлдвэрүүдэд хориг тавибал Хятадын хөрөнгө оруулагчид томоохон саад бэрхшээлтэй тулгарч болзошгүй гэж шинжээчид үзэж байна.
