2026 онд Канад, Мексик, АНУ-д хамтран зохион байгуулагдах хөлбөмбөгийн Дэлхийн аварга шалгаруулах тэмцээнийг угтан Канад улсад сонирхолтой нэгэн үйл явдал болж өнгөрлөө. Тус улсын нэгэн компани хөлбөмбөгийн ширээний тоглолтыг бодит хэмжээнд буулгасан "хүний хөлбөмбөг"-ийн аварга том талбайг байгуулж, Гиннесийн дэлхийн дээд амжилтыг албан ёсоор шинэчлэн тогтоосон байна.
Хүний хөлбөмбөг гэдэг нь ширээний хөлбөмбөгийн тоглоомын зарчмаар, тоглогчид нь хөндлөн бариулаас барин зөвхөн хажуу тийш шилжих замаар бөмбөг өшиглөдөг тоглоом юм. Энэ удаагийн арга хэмжээнд маш олон хүн оролцож, хөлбөмбөгийн тоглолтын уур амьсгалыг өвөрмөц байдлаар мэдрүүлжээ.
Зохион байгуулагчдын зүгээс хэлэхдээ, энэхүү үйл ажиллагаа нь зөвхөн дээд амжилт тогтоох төдийгүй, ирэх 2026 оны дэлхийн аваргын тэмцээнийг сурталчлах, хүмүүсийн дунд хөлбөмбөгийн спортыг түгээн дэлгэрүүлэх зорилготой байсан гэв. Канад улс түүхэндээ анх удаа хөлбөмбөгийн ДАШТ-ийг эх орондоо хүлээн авах гэж байгаа тул ийнхүү олон нийтийг хамарсан арга хэмжээнүүд эрчимтэй өрнөж байна.
Гиннесийн дээд амжилтын шүүгчид талбайн хэмжээ болон оролцогчдын тоог нарийвчлан шалгасны эцэст уг үйл ажиллагааг дэлхийн хамгийн том "хүний хөлбөмбөг"-ийн тоглолт хэмээн баталгаажуулжээ. Энэхүү амжилт нь хөлбөмбөгийн хорхойтнуудын хувьд ДАШТ-ийг тэсэн ядан хүлээх нэгэн өвөрмөц хөшүүрэг болж байна.
