Дэлхийн хөгжмийн ертөнцийн амьд домог, 80-аад оны поп хөгжмийн од Лайонел Ричи хиймэл оюун ухааны (AI) эрин үед өөрийн бүтээлч байдал болон хувь хүний онцлогийг хамгаалах шинэ арга хэмжээ авч эхэллээ. Тэрээр өөрийн алдарт "Hello" дууны "Hello, is it me you’re looking for?" гэх алдарт өгүүлбэрийг багтаасан өвөрмөц хоолойн өнгө, хэв маягаа хуулийн дагуу бүртгүүлэх буюу "Trademark" хийлгэхээр зэхэж байна.
Сүүлийн үед хиймэл оюун ухааны технологийн хөгжил хурдасч, дуучин, жүжигчдийн хоолойг яг таг дуурайлган дуу гаргах, яриулах явдал түгээмэл болсон. Энэ нь уран бүтээлчдийн оюуны өмчид халдаж, тэдний зөвшөөрөлгүйгээр хоолойг нь арилжааны зорилгоор ашиглах эрсдэлийг дагуулж байна. Лайонел Ричи энэ асуудлыг ноцтой хүлээн авч, Тейлор Свифт зэрэг бусад одуудын нэгэн адил өөрийн дуу хоолойг "брэнд" хэмээн үзэж, хуулийн хамгаалалтад авахаар шийджээ.
Түүний энэхүү алхам нь зөвхөн дууны үг төдийгүй, дуучны өвөрмөц хоолойг хууль ёсны өмч хэмээн хүлээн зөвшөөрүүлэхэд чиглэсэн чухал жишиг болж байна. Хэрэв энэ хүсэлт амжилттай болбол, цаашид хэн нэгэн хиймэл оюун ухаан ашиглан Ричигийн хоолойг дуурайлгаж, дуу гаргах эсвэл зар сурталчилгаанд ашиглах нь хуулийн хариуцлага хүлээх нөхцөл бүрдэх юм.
Хөгжмийн салбарт хиймэл оюун ухаан нь шинэ боломжуудыг нээж байгаа ч ийнхүү уран бүтээлчдийн эрх ашгийг хамгаалах асуудал хамгийн том сорилт болоод байна. Лайонел Ричигийн энэ үйлдэл нь ирээдүйд олон уран бүтээлчид өөрийн бүтээлч өв болон хувь хүний онцлогоо хэрхэн хамгаалах үлгэр дуурайл болох нь дамжиггүй.
