Британийн нэрт дуучин, поп од Лили Аллен-ы амьдрал болон уран бүтээлийн замналыг харуулсан баримтат кино удахгүй Amazon Prime Video тавцанд гарах гэж байна. Одоогоор нэр нь тодорхойгүй байгаа уг бүтээлийг 2027 онд гаргахаар төлөвлөжээ.
Киноны найруулагчаар Oasis болон Coldplay хамтлагуудын тухай баримтат бүтээлүүдээрээ танигдсан Мэт Уайткросс ажиллах юм. Уг баримтат кинонд дуучин бүсгүйн "MySpace-ийн хатан хаан" байхаас эхлээд өнөөгийн соёлын томоохон төлөөлөгч болтлоо туулсан онцгой замыг харуулах аж. Мөн тэрээр орчин үеийн хөгжмийн салбарт эмэгтэй уран бүтээлчдийн замыг зассан нөлөө бүхий хүн гэдгийг онцолжээ.
Бүтээлийн багийн зүгээс үүнийг Лили Алленыг урьд өмнө хэзээ ч байгаагүйгээр нь харуулах "үнэн бодит, илэн далангүй" түүх хэмээн тодорхойлсон байна. Кинонд түүнийг хамгийн сайн мэддэг хүмүүсийн ярилцлага багтах бөгөөд зөвхөн Amazon Prime Video-д төдийгүй дэлхийн кино театруудаар ч гаргахаар төлөвлөөд байгаа юм.
Саяхан 'West End Girl' цомгоо гаргасан Лили Аллен нь сүүлийн үед жүжиглэх урлагт ч хүч сорьж, Виржиниа Вүүлфийн зохиолоос сэдэвлэсэн 'Night And Day' кинонд тоглосон билээ. Түүний сүүлийн үеийн 'West End Girl' аялан тоглолт нь шүүмжлэл болон бахархлыг зэрэг дагуулж байсан бөгөөд дуучин бүсгүй өөрийн тоглолтоороо бахархаж байгаагаа илэрхийлсэн юм.
