Попын хаан Майкл Жексоны 1993 оны “Super Bowl”-ын завсарлагааны тоглолтоос хойш гуч гаруй жил өнгөрсөн бөгөөд Hulu болон ESPN түүний энэхүү түүхэн үзүүлбэрийг эргэн харуулах шинэ бүтээл гаргахаар зарлалаа. “Spectacle: Michael Jackson at the Super Bowl” нэртэй бүрэн хэмжээний баримтат кино нь 2027 оны хоёрдугаар сард Hulu болон ESPN платформоор цацагдах юм.
Өмнө нь Netflix-ийн “The Greatest Night in Pop” бүтээл дээр ажиллаж байсан Бао Нгуен энэхүү баримтат киног найруулж байна. Уг кино нь 1993 оны завсарлагааны шоу хэрхэн бий болсон тайзны ардах үйл явцыг дэлгэхээс гадна попын супер од болон түүний багийн өмнө нь дэлгэж байгаагүй дүрс бичлэгүүдийг багтаахаараа онцлогтой. Энэ нь телевизийн томоохон арга хэмжээний хэлбэрийг өөрчлөхөд нөлөөлсөн уг тоглолтыг өөр өнцгөөс харах боломжийг үзэгчдэд олгох аж.
Шинээр гарсан богино тизерт Майкл Жексон цэрэг маягийн өмсгөлтэйгөөр Калифорни мужийн Пасадена дахь “Rose Bowl” цэнгэлдэхийн тайзан дээр гарч, түүний нэрийг дуудан хашхирах олон мянган үзэгчийг байлдан дагуулж буй хэсэг харагддаг.
Жексоны 1993 оны нэгдүгээр сарын 31-нд үзүүлсэн тоглолт “Super Bowl”-ын завсарлагааны шоуны хувьд эргэлтийн цэг болсон юм. Энэ нь зүгээр нэг тоглолтын дундах завсарлага төдий биш, бие даасан томоохон үйл явдал болж, улмаар тус завсарлагааны тайз хөгжмийн ертөнцийн том одуудын гарах гол цэг болох эхлэлийг тавьжээ.
Майкл Жексон энэхүү тоглолтоос өмнө ч чартуудад өндөр амжилт үзүүлсэн байсан юм. Тэрээр гоцлол уран бүтээлчийн хувиар Billboard Hot 100 чартад “Billie Jean”, “Beat It”, “Black or White” зэрэг 13 шилдэг дуугаараа 1-р байранд бичигдэж байв. Мөн түүний 1982 онд гарсан “Thriller” цомог нь Billboard 200 чартыг 37 долоо хоногийн турш тэргүүлж, Billboard Hot 100 чартын шилдэгт багтсан долоон хит дуу төрүүлж байжээ.
