Залуу үеийнхний дуртай дуучин, Америкийн поп од Оливия Родриго саяхан Барселонад болсон өөрийн тоглолтоороо шүтэн бишрэгчдээ гайхшруулсан билээ. Тэгвэл энэхүү тоглолтын бичлэгийг “Billions Club Live with Olivia Rodrigo: A Concert Film” нэртэйгээр Spotify стриминг үйлчилгээгээр үзэх боломжтой болох нь.
Оливия Родриго бол “drivers license”, “good 4 u” зэрэг хит дуунуудаараа дэлхий дахинд танигдсан, Грэммийн шагналт залуу дуучин юм. Түүний дуунууд нь ялангуяа залуу үеийнхний дунд маш их алдартай бөгөөд хайр дурлал, өсвөр насны бэрхшээл зэрэг сэдвүүдийг хөнддөгөөрөө онцлогтой.
Spotify-д гарах киноны тизер нь аль хэдийн цацагдаад байгаа бөгөөд Оливиягийн тоглолтын эрч хүч, фенүүдийн халуун дотно уур амьсгалыг харуулж байна. Энэхүү кино нь зөвхөн тоглолтын бичлэгээс гадна, Оливиягийн ярилцлага, тоглолтын бэлтгэл ажлыг ч багтаасан байх магадлалтай.
Оливия Родригогийн фенүүд болон поп хөгжим сонирхогчид энэхүү киног тэсэн ядан хүлээж байгаа нь дамжиггүй. Spotify-д хэзээ гарах нь одоогоор тодорхойгүй байгаа ч, удахгүй гарах байх гэж найдаж байна. Удахгүй болох мэдээг Uujim.com сайтаар дамжуулан хүргэх болно.
