Дэлхийн хөгжмийн ертөнцийн супер од, дуучин Тейлор Свифт саяхан болсон NBA-ийн плей-оффын тоглолтын үеэр Нью-Йорк Никс багийн ялалтыг талбайн дэргэдээс үзэж сонирхжээ. Тэрээр алдарт жүжигчин Мариска Харгитай болон Haim хамтлагийн гишүүд болох Алана, Эсте нарын хамт Мэдисон Сквер Гарден цэнгэлдэх хүрээлэнд хүрэлцэн ирсэн байна.
Нью-Йорк Никс баг цувралын дөрөв дэх тоглолтод өрсөлдөгчөө буулган авч, ялалт байгуулсны дараа цэнгэлдэх хүрээлэн бүхэлдээ хөл хөдөлгөөнд орсон юм. Энэхүү баярт мөчийг поп од маань ч мөн адил багийн хөгжөөн дэмжигчидтэй нэгдэн, догдлон тэмдэглэж буй бичлэгүүд цахим сүлжээнд тархжээ. Тейлор Свифт нь дэлхийн хамгийн алдартай дуучин төдийгүй, тоглолт бүр нь цэнгэлдэх хүрээлэнгүүдийг дүүргэдэг нөлөө бүхий уран бүтээлч юм.
Түүнийг ийнхүү спортын томоохон үйл явдлуудад үзэгдэх болсон нь шүтэн бишрэгчдийнх нь зүгээс ихээхэн сонирхол татаж байгаа бөгөөд сагсан бөмбөгийн талбайд ч түүний нэр хүнд, эрч хүч мэдрэгдсэн хэвээр байна.
