Та хэр удаан амьдрах вэ? Энэ асуултын хариултыг яг таг мэдэх боломжгүй ч гэртээ үнэ төлбөргүй хийж болох энгийн сорилуудын тусламжтайгаар өөрийн биеийн байдлыг үнэлэх боломжтой. Тухайлбал, суугаад босох сорил, нэг хөл дээрээ 10 секунд зогсох, суниалт хийх эсвэл бариулаас дүүжлэгдэх зэрэг нь таны биеийн ерөнхий төлөв байдлыг илтгэх үзүүлэлтүүд юм. Эдгээр сорил дээр муу үзүүлэлт үзүүлэх нь эрт нас барах эрсдэлийг нэмэгдүүлдэг болохыг судалгаагаар тогтоожээ.
Фитнесс ба урт наслалт
Америкийн Зүрхний коллежийн сэтгүүлд нийтлэгдсэн судалгаагаар биеийн тамирын түвшин сул байх нь зүрхний бусад аливаа эрсдэлт хүчин зүйлээс илүүтэйгээр эрт нас барах эрсдэлтэй холбоотой болохыг Арнольд Шварценеггерийн мэдээллийн товхимолд дурджээ. Судлаачдын үзэж байгаагаар насны ангилал тус бүрдээ дунд зэргийн эрсдэлтэй хүмүүс биеийн тамираа сайжруулснаар нас барах эрсдэлийг дор хаяж 50 хувиар бууруулах боломжтой юм.
Үүнийг үнэлэх нэг арга нь MET (Metabolic Task Equivalents) буюу бодисын солилцооны энергийн зарцуулалтын хэмжүүр юм. Нэг MET нь тайван суугаа байдлыг илэрхийлдэг бол 3-4 MET нь хурдан алхах, 10 MET нь 10 минутын турш миль гүйх зэрэгтэй тэнцдэг. JAMA сэтгүүлд нийтлэгдсэн судалгаагаар MET-ийн түвшнийг нэг шатаар ахиулах бүрд аливаа шалтгаант нас барах эрсдэл 13 хувиар, зүрхний шигдээс үүсэх эрсдэл 15 хувиар буурдаг болохыг тогтоожээ.
Өөрийгөө сорих нь
Та өөрийн MET түвшинг шатаар өгсөх сорил ашиглан үнэлж болно. Дөрвөн давхар шатыг (60 гишгүүр) аль болох хурдан өгсөж үзээрэй. Хэрэв танд 90 секундээс илүү хугацаа зарцуулагдвал энэ нь анхаарах ёстой үзүүлэлт юм. Харин 60 секундээс дотогш хугацаанд гарвал сайн, 40 секундээс дотогш бол маш сайн буюу 10 MET-тэй тэнцэхүйц чадавхтай гэсэн үг.
Хамгийн гол нь хаана байгаагаас үл хамааран биеийн тамираа сайжруулах нь чухал. Хэрэв та идэвхгүй амьдралтай бол энгийн алхалтаас эхэлж, улмаар гүйлт, шатаар өгсөх, дугуй унах эсвэл бурпи дасгал зэргийг хэвшилдээ оруулах нь зүрх судасны фитнессийг сайжруулж, урт наслахад тустай юм.
