Цахим спортын ертөнцийн домогт тамирчин, League of Legends тоглоомын мэргэжлийн тоглогч Ли 'Фэйкер' Сан-Хёк Өмнөд Солонгосын Үндэсний цагдаагийн газраас зохион байгуулсан ёслолын арга хэмжээний үеэр Хүндэт цагдаа бөгөөд Цахим мөрийтэй тоглоомын эсрэг элч төлөөлөгчөөр албан ёсоор томилогджээ.
Сөүл хотын Содэмүн-гү дүүрэгт байрлах цагдаагийн төв байранд болсон уг арга хэмжээний хүрээнд тэрээр залуучуудын дунд газар авч буй цахим мөрийтэй тоглоомын хор уршгийг таниулах, урьдчилан сэргийлэх ажилд хувь нэмрээ оруулах юм. Фэйкер нь цагдаагийн байгууллагаас хэрэгжүүлж буй залуучуудын цахим мөрийтэй тоглоомын эсрэг сайн дурын мэдээлэх хөтөлбөрийг сурталчлахын зэрэгцээ, сурталчилгааны видео болон зурагт хуудаснуудад дүр төрхөө ашиглан олон нийтэд нөлөөлөх үүрэг хүлээж байна.
Зургаан удаагийн дэлхийн аварга цолтой түүний хувьд энэхүү томилгоо нь нийгмийн хариуцлагын хүрээнд хийгдэж буй чухал ажил болж байгаа юм. Тэрээр өмнө нь өөрийн гэсэн шуудангийн марктай болж байсан бөгөөд энэ удаад хууль сахиулах байгууллагатай хамтран ажиллаж байгаа нь түүний нийгэмд үзүүлэх нөлөөлөл хэр өргөн хүрээтэй байгааг харуулж байна.
