Технологийн компаниуд хиймэл оюун ухааны (AI) загваруудаа сургахын тулд интернэт дэх мэдээллийг олон жилийн турш ашиглаж ирсэн. Гэвч сүүлийн үед интернэтэд хиймэл оюун ухаанаар бичигдсэн контентууд ихсэх болсон нь хөгжүүлэгчдийг шинэ арга зам хайхад хүргэж байна. Ингэснээр тэдний анхаарал хуучин номын тавиур руу чиглэж эхэллээ.
Хуучин ном яагаад үнэ цэнтэй болов?
Хиймэл оюун ухааны загварууд өмнөх загваруудын бүтээсэн мэдээллээр хэт их сургагдвал алдаагаа давтаж, хүний бичвэрт байдаг олон талт байдлаа алддаг гэж судлаачид үздэг. Үүнийг "загварын нуралт" (model collapse) хэмээн нэрлэдэг. Харин хиймэл оюун ухааны эрин үеэс өмнө хэвлэгдсэн номууд нь хүний гараар бичигдсэн, засварлагдсан, бүтэцлэгдсэн мэдээллийг агуулдаг тул илүү найдвартай эх сурвалж гэж тооцогдож байна.
Номыг сканнердах нууц үйл ажиллагаа
ISBNdb хэмээх онлайн номын сангийн мэдээллийн сан бүхий компани нь AI хөгжүүлэгчдэд зориулан нэг удаагийн захиалгаар 1 сая хүртэлх ном нийлүүлэх боломжтойгоо зарлаж байв. Энэхүү үйлчилгээ нь ховор, хуучин, хэвлэгдэхээ больсон номуудыг цуглуулж, тэдгээрийг сканнердах үйл явцыг багтаадаг. Үүний тулд номын хавтасыг тасдаж, хуудсыг нь үйлдвэрийн сканнераар дамжуулан дижитал хэлбэрт оруулах замаар номыг устгах тохиолдол гардаг байна. Тус компани нь үйлчлүүлэгчдийн нууцыг хадгалахын тулд хатуу гэрээ (NDA) байгуулдаг байсан ч, сүүлд энэхүү үйлчилгээгээ зогсоож байгаагаа мэдэгджээ.
Үүнтэй төстэй үйл ажиллагааг томоохон компаниуд ч хэрэгжүүлж байна. Холбооны шүүхийн баримтаас үзэхэд Anthropic компани сая сая хуучин номыг худалдан авч сканнердсан нь тодорхой болжээ. АНУ болон Европын хуучин ном худалдаалагчид ч ховор, хуучин номнуудын бөөнөөр хийгдэх захиалга ихэссэнийг мэдээлж байна.
