Технологийн салбарын мэдээллийн Billboard сайтад мэдээлснээр, Amazon платформ дээр өөрийн гараар Bluetooth чанга яригч угсрах боломжтой шинэ иж бүрдэл худалдаанд гарчээ. Энэхүү бүтээгдэхүүн нь STEM буюу шинжлэх ухаан, технологи, инженерчлэл, математикийн боловсролыг практик ажиллагаатай хослуулснаараа онцлог юм.
Уг иж бүрдэл нь ямар нэгэн гагнуур хийх, цавуу ашиглах шаардлагагүй бөгөөд бүх эд ангиудыг хооронд нь хялбархан угсрах боломжтойгоор бүтээгдсэн байна. Тус төхөөрөмж нь Bluetooth 5.0 стандартыг ашиглан гар утас эсвэл зөөврийн компьютерт холбогдох ба 20 ширхэг LED гэрэл нь хөгжмийн хэмнэлд нийцэн анивчдаг байна. Чанга яригчийн эд ангиуд нь нийлэг буюу акрил бүрхүүлд багтах бөгөөд нийт хэмжээ нь ойролцоогоор 6 x 3.2 инч юм.
Үйлдвэрлэгчийн зүгээс уг иж бүрдлийг хүүхдүүдийн сургалтад зориулан бүтээсэн гэж тайлбарласан ч хөгжим сонирхогч бүх насныханд тохиромжтой гэж үзэж байна. Одоогоор уг бүтээгдэхүүн нь хар болон цэнхэр өнгийн сонголттойгоор 35.99 ам.долларын үнэтэйгээр худалдаалагдаж байна. Хэрэглэгчид уг төхөөрөмжийг ажиллуулахын тулд нэмэлтээр батерей худалдан авах шаардлагатай юм.
Үүнээс гадна, Amazon сайтад модон материалаар хийгдсэн, муурны нүүрний хэлбэртэй FM радио болон мини Bluetooth чанга яригч угсрах өөр нэгэн иж бүрдэл 16.99 ам.доллараар худалдаалагдаж байна. Энэхүү төхөөрөмж нь гурван ваттын хүчин чадалтай дуугаралттай бөгөөд USB кабель эсвэл гурван ширхэг АА батерейгаар ажилладаг байна.
