Их Британийн дуучин, ая зохиогч Raye ирэх долоо хоногт буюу 10 дугаар сарын 23-нд Лондон хотын Royal Albert Hall-д "This Symphony May Contain Hope" нэртэй ганцхан үдшийн амьд тоглолтоо шүтэн бишрэгчдэдээ зориулан зохион байгуулахаар төлөвлөөд байжээ. Тус танхим нь 5,000 хүний суудалтай багтаамжтай юм.
Дуучин эхэндээ мянга мянган бүртгэл ирэх байх гэж тооцоолж, сонирхсон хүмүүст урьдчилсан борлуулалтын холбоос илгээн, тасалбарыг эхэлж ирсэнд нь түрүүлж олгох зарчмаар худалдах гэж байсан бололтой. Гэтэл нийт 1.8 сая бүртгэл ирсэн байна. Raye-ийн хэлснээр, эдгээр бүртгэлийн дийлэнх нь шүтэн бишрэгчдээс нь ашиг олохыг зорьсон дамлан худалдаалагчдын ажиллуулсан хиймэл оюунт (AI) ботууд байжээ.
Хиймэл оюунт ботуудын цар хүрээ
Raye өөрийн X хуудсандаа: "Харамсалтай нь манай бүртгэлийн явцыг дамлан худалдаалагчид эзэлж, AI ботууд ашиглан олон зуун мянган хуурамч бүртгэл үүсгэсэн байна. Бид одоо цоо шинэ ертөнцөд амьдарч байна, би ийм хэмжээний цар хүрээтэй ботуудыг хэзээ ч харж байгаагүй" хэмээн бичжээ. Мөн тэрбээр шүтэн бишрэгчид нь тасалбарыг анхны үнээр нь авах боломжтой байх нь түүний хувьд маш чухал гэдгийг онцолсон байна.
Raye зөвхөн энэ удаагийн тусгай тоглолтын хувьд багийнхантайгаа хамтран бүртгэлийн жагсаалтыг гараар шалгаж, бодит шүтэн бишрэгчид гэж итгэж буй хүмүүстээ урьдчилсан борлуулалтын холбоос болон кодыг илгээх болно гэдгээ мэдэгдлээ. Тэрбээр: "Тасалбар борлуулалтын ирээдүй ямар байхыг сайн мэдэхгүй ч энэ явдал миний нүдийг үнэхээр нээлээ" гэж нэмж хэлжээ.
Тасалбарын зах зээл дэх асуудал
Концерт, аялан тоглолт, спортын арга хэмжээний тасалбарыг дамлан худалдаалах нь үргэлж асуудал дагуулсаар ирсэн билээ. Гэвч хиймэл оюуны хөгжил нь дамлан худалдаалагчдад тасалбар худалдан авах үйл явцаа хялбарчилж, цар хүрээгээ тэлэхэд тусалж байгаа бөгөөд энэ нь жинхэнэ шүтэн бишрэгчдэд үндсэн үнэтэй тасалбар бараг үлдэхгүй байх, эсвэл цөөхөн үлдэхэд хүргэдэг аж. Иймээс зарим уран бүтээлчид тасалбарын хүртээмжийг хангахын тулд бүтээлч аргуудыг эрэлхийлэхэд хүрчээ. Тухайлбал, Spotify саяхан уран бүтээлчдэд жинхэнэ шүтэн бишрэгчдээ таньж, орон нутгийн шоуных нь тасалбарыг эхэлж авах боломж олгоход туслах шинэ функцуудыг гаргасан байна.
АНУ-д Худалдааны холбооны комисс саяхан концертын зах зээлийн дийлэнхийг хянадаг Ticketmaster компанийг тасалбарын үнийг хөөрөгдөхийн тулд дамлан худалдаалагчидтай хамтран ажилласан байж болзошгүй хэмээн шүүхэд өгчээ. Тус компани буруутгалыг няцаасан ч тангарагтны шүүх тэднийг хэрэглэгчдийг хохироож, монопол эрх мэдлээ урвуулан ашигласан гэж үзсэн байна. Гэсэн хэдий ч дамлан худалдаалах асуудлыг урт хугацаанд шийдэх арга зам нэн шаардлагатай байгаа юм. Ганц удаагийн тоглолтын хувьд AI ботын бүртгэлүүдийг гараар шүүн шалгах боломжтой байж болох ч олон сараар үргэлжлэх улс дамнасан болон дэлхийн аялан тоглолтуудын хувьд энэ нь боломжгүй мэт харагдаж байна.
