Кино урлагийн ертөнцөд хиймэл оюун ухааны (AI) нөлөөллийн талаарх маргаан үргэлжилсээр байна. "Оддын дайн" (Star Wars) цувралыг бүтээгч, алдарт найруулагч Жорж Лукас энэ талаарх байр сууриа илэрхийлж, уг технологи нь ирээдүйн кино урлагийн салшгүй нэг хэсэг болох нь гарцаагүй гэжээ.
"A Rabbit’s Foot" сэтгүүлд өгсөн ярилцлагадаа тэрээр хиймэл оюун ухаан нь кино бүтээх үйл явцыг илүү хялбар болгож байгааг онцолсон байна. Тэрээр үүнийг морин тэрэгнээс автомашин руу шилжсэнтэй адилтган, "Энэ бол дэвшил, энэ бол ирээдүй. Үүний эсрэг хийж чадах зүйл гэж үгүй" хэмээн тайлбарлажээ.
Хиймэл оюун ухаан нь хүний бүтээлч байдлыг орлох, мөн уран бүтээлчдийн зөвшөөрөлгүйгээр тэдний бүтээлийг ашиглан сургагдсан гэх шүүмжлэлүүд кино салбарт өрнөж буй. Гэвч Лукас үүний эрсдэлийн талаарх асуултад хариулахдаа, технологийн тусламжтайгаар хуурамч контентыг таньж мэдэх боломжтой гэдгийг сануулсан юм. Тэрээр: "Хэрэв танд ямар нэг зүйл хуурамч эсэхийг хэлж өгөх AI хэрэгтэй бол, AI үүнийг хийж чадна. Харин хүн төрөлхтөн бид тийм ч ухаантай биш. Хүн гэдэг утгаараа та өөрийн хэлсэн, хийсэн зүйлдээ хариуцлага хүлээх ёстой" хэмээжээ.
Кино урлагийн салбарт хиймэл оюун ухааны ашиглалт нь маш их маргаан дагуулж байна. Тухайлбал, найруулагч Мартин Скорсезе хиймэл оюун ухааны компанийг дэмжсэнийхээ төлөө шүүмжлэлд өртсөн бол, жүжигчин Жоди Фостер "F1" киног хиймэл оюун ухаанаар бүтээгдсэн хэмээн хамгаалж байр сууриа илэрхийлсэн юм (Гэвч "F1" киноны бүтээлтэд AI ашигласан эсэх нь албан ёсоор батлагдаагүй). Мөн саяхан хиймэл оюун ухаанаар бүтээгдсэн "жүжигчин" Тилли Норвуд дэлгэцийн бүтээлд анх удаа тоглохоор болсон нь олны анхаарлыг татаад байна.
