Их Британийн засгийн газар тус улсын хөгжмийн салбарыг дэмжих зорилгоор 60 сая долларын санхүүжилт бүхий өргөн хүрээтэй хөтөлбөрийг зарлалаа. Энэхүү "Music Growth Package" буюу хөгжмийн салбарыг өсгөх багц нь анх төлөвлөж байснаас 20 сая доллароор илүү санхүүжилттэй болж байна.
Соёлын сайд Лиза Нэнсигийн мэдээлснээр, хөгжмийн салбар нь Их Британийн эдийн засагт 10.7 тэрбум долларын хувь нэмэр оруулдаг байна. Тэрээр хөгжим бол нийгмийг холбогч гүүр болохыг онцлоод, авьяас чадвар хаа сайгүй байдаг ч боломж бүгдэд тэгш олддоггүйг дурджээ. Засгийн газрын зүгээс энэхүү хөрөнгө оруулалтаар дамжуулан ирэх гурван жилийн хугацаанд 2,000 гаруй төсөл болон 40,000 орчим уран бүтээлч, салбарын мэргэжилтнүүдийг дэмжихээр төлөвлөж байна.
Энэхүү хөтөлбөрийн хүрээнд хөгжмийн салбарын лицензийн системд шинэчлэл хийхээр болжээ. Тодруулбал, арга хэмжээ зохион байгуулагчдад олгодог түр зөвшөөрлийн тоог жилд 15-аас 20 болгон нэмэгдүүлж, арга хэмжээ үргэлжлэх хугацааг 21-ээс 26 хоног болгож сунгасан байна. Мөн амьд хөгжмийн тоглолтын талбайнуудад 15 хувийн татварын хөнгөлөлт үзүүлэхээр болжээ.
Түүнчлэн, алдартай дуучин Эд Шийраны үүсгэн байгуулсан сан нь орон нутгийн номын сангуудын хөгжмийн үйл ажиллагааг дэмжих "Music In Libraries" санаачилгад хамтран оролцох юм. Засгийн газар өмнө нь 5,000-аас дээш хүний суудалтай цэнгэлдэх хүрээлэн болон аренад зохион байгуулагдах тоглолтуудаас 1 долларын сайн дурын хандив цуглуулж, түүнийгээ хөгжмийн салбарын анхан шатны уран бүтээлчдийг дэмжихэд зарцуулах санаачилгыг дэмжиж ирсэн билээ. Энэхүү үйлсэд Харри Стайлс, Coldplay болон Кэти Перри зэрэг алдартнууд хувь нэмрээ оруулсан байна.
