Попын хаан Майкл Жексоны 1993 оны Super Bowl XXVII тэмцээний завсарлагаанаар хийсэн түүхэн үзүүлбэрийг харуулсан "Spectacle: Michael Jackson at the Super Bowl" нэртэй бүрэн хэмжээний баримтат кино гарахаар боллоо. Уг бүтээл 2027 оны хоёрдугаар сард Hulu болон ESPN-ээр үзэгчдийн хүртээл болох юм.
Киног Netflix-ийн "The Greatest Night in Pop" бүтээлийг найруулсан Бао Нгуен (Bao Nguyen) найруулж байна. Энэхүү баримтат бүтээлээр Жексоны хагас цагийн завсарлагын тоглолтыг бэлтгэсэн хөшигний цаадах үйл явцыг дэлгэрэнгүй харуулахаас гадна дуучин болон түүний багийн өмнө нь цацагдаж байгаагүй ховор дүрсийг багтаах аж.
Саяхан цацагдсан богино тизер бичлэгт Калифорни мужийн Пасадена дахь "Роуз Боул" цэнгэлдэх хүрээлэнд Майкл Жексон өөрийн нэрийн хуудас болсон цэрэг загварын хувцастайгаа тайзан дээр гарч ирж, мянга мянган хөгжөөн дэмжигч түүний нэрийг уриалан хашхирч буй агшин багтжээ.
1993 оны нэгдүгээр сарын 31-нд болсон уг тоглолт нь Super Bowl-ийн завсарлагын шоуны түүхэнд томоохон эргэлт авчирсан юм. Энэ нь зүгээр нэг тоглолтын завсарлага байхаа больж, бие даасан томоохон арга хэмжээ болон хувирч, хөгжмийн салбарын шилдэг одод хүрэлцэн ирдэг тавцан болох эхлэлийг тавьжээ.
Майкл Жексон уг тайзан дээр гарахаасаа өмнө ч хөгжмийн чартуудыг тэргүүлж байсан билээ. Тэрбээр соло уран бүтээлчийн хувиар Billboard Hot 100 чартыг "Billie Jean", "Beat It", "Black or White" зэрэг 13 дуугаараа тэргүүлсэн түүхтэй. Мөн түүний 1982 онд гарсан "Thriller" цомог Billboard 200 жагсаалтыг 37 долоо хоногийн турш тэргүүлж, Hot 100 жагсаалтын шилдэгт багтсан долоон хит дуу төрүүлж байв.
