Грэммийн шагналт дуучин Оливиа Родриго өөрийн хамгийн том мөрөөдлүүдийн нэг болох Daisy Chain Fields хөгжмийн наадмаа амжилттай зохион байгуулжээ. Тэрбээр уг наадмыг карьерынхаа хамгийн том баяр хөөр хэмээн тодорхойлсон байна.
Калифорни мужийн Ирвайн хотод бямба гарагт зохион байгуулагдсан тус наадам нь зөвхөн эмэгтэй уран бүтээлчдээс бүрдсэн бүрэлдэхүүнтэйгээрээ онцлог байв. Наадамд Chappell Roan, Doechii, Mitski, Bikini Kill, The Breeders зэрэг уран бүтээлчид оролцсон бөгөөд Родригогийн гол тоглолтын үеэр Стиви Никс, Сара Маклахлан болон гэнэтийн зочин Аланис Мориссетт нар тайзнаа гарч иржээ.
Тоглолтын маргааш нь Оливиа Родриго инстаграм хуудсаараа дамжуулан сэтгэгдлээ хуваалцахдаа энэхүү үйл явдлыг бодит ажил болгоход тусалсан хүн бүрд талархаж буйгаа илэрхийлсэн юм. Тэрбээр тоглолтууд дууссаны дараа найзуудтайгаа наадмын талбайд гүйж, үүдэнд байрлуулсан уран бүтээлч Йоко Оногийн ‘Wish Tree’ инсталляцын дэргэд очсоноо хуваалцжээ. Наадамд ирэгсэд тус модонд өөрсдийн хүслээ бичиж уясан байсан бөгөөд ихэнх нь дэлхий ертөнцийг илүү тайван амгалан байхыг, хайртай хүмүүсээ аз жаргалтай байхыг хүссэн байсныг тэрбээр дурдсан байна.
Vogue Philippines сэтгүүлд өгсөн ярилцлагадаа Родриго уран бүтээлчдийг урихад хэн нь ч татгалзаагүйг онцлоод, энэ үеийн эмэгтэйчүүдийн нэг хэсэг болж буйдаа маш их бахархаж байгаагаа илэрхийлжээ. Мөн уг наадмаас олсон бүх орлогыг эмэгтэйчүүд болон охидыг дэмжих Planned Parenthood, Center for Reproductive Rights зэрэг байгууллагуудад бүрэн хандивлахаар болсон байна.
