Их Британийн нэрт дуучин Сэм Фендер болон өсөж яваа уран бүтээлч Оливиа Дийн нарын хамтран бүтээсэн “Rein Me In” дуу Их Британийн албан ёсны сингл чартад түүхэн амжилт тогтоолоо.
Энэхүү дуу нь Их Британийн чартад нийт 16 долоо хоногийг №1 байранд өнгөрүүлээд байна. Ингэснээр уг уран бүтээл 2020-оод оны хамгийн удаан хугацаанд тэргүүлсэн сингл болж, өмнө нь Алекс Уоррены “Ordinary” дууны тогтоосон 13 долоо хоногийн амжилтыг эвджээ. Түүнчлэн, энэ нь 21-р зууны хамгийн удаан хугацаанд тэргүүлсэн дуунуудын нэг болох Дрейкийн “One Dance”-тэй тэнцэж, Wet Wet Wet хамтлагийн “Love is All Around” дууг ардаа орхин, Их Британийн түүхэн дэх хамгийн удаан хугацаанд №1 байрт бичигдсэн Британи дуу болсон байна.
Уг дууны түүх 2025 оны 6-р сард Лондоны цэнгэлдэх хүрээлэнд болсон Сэм Фендерийн тоглолтоос эхлэлтэй. Тэрээр өөрийн “People Watching” цомгийн дуу болох “Rein Me In”-ийг дуулах үеэрээ тухайн үед өсөж яваа уран бүтээлч байсан Оливиа Дийнийг тайзан дээр урьж, шинэ хувилбараар дуулсан нь олны анхаарлыг татсан юм. Улмаар хоёр уран бүтээлч хоёулаа дэлхийн тавцанд Британийн хөгжмийн урлагийг тэргүүлэн алхаж байна.
Өнгөрсөн хоёрдугаар сард Манчестер хотноо болсон БРИТ хөгжмийн наадмын үеэр уг дуу нь олон нийтийн санал хураалтаар “Оны шилдэг дуу” шагналыг хүртжээ. Мөн тавдугаар сарын эхээр чартыг тэргүүлж байх үед Оливиа Дийн өөрийн тоглолтын үеэр Сэм Фендерийг урьж, тус дууг дахин амьдаар дуулсан байна.
