Америкийн комедиан Шэйн Гиллис өнгөрсөн амралтын өдрүүдээр «Saturday Night Live» (SNL) шоуг гурав дахь удаагаа хөтлөн хүргэх үеэрээ хэлсэн нээлтийн үгнээсээ болж ширүүн шүүмжлэлд өртөөд байна.
Тэрбээр монологтоо фитнесс төвд явдаг эмэгтэйчүүдийн өмссөн богино өмдийг доромжилсон өнгө аястайгаар дүрсэлсэн нь олон хүний эгдүүцлийг төрүүлжээ. Тухайлбал, жүжигчин Дэн Леви өөрийн Инстаграмдаа бичлэг хийж байршуулан, эмэгтэйчүүд фитнесст богино өмд өмссөнөөрөө тийм нэр зүүх учиргүй, харин тэднийг тэгж дуудаж буй эрчүүд нь эмэгтэйчүүдийг үзэн ядагчид хэмээн байр сууриа илэрхийлсэн байна.
Левигийн бичлэгийг хөгжимчид болон урлагийн одууд олноор дэмжжээ. Жюэл, Кристин Ченовет, Лиза Лоеб нар сэтгэгдэл үлдээж дэмжлэгээ илэрхийлсэн бол дуучин Билли Айлиш, Финнеас нарын ээж, идэвхтэн Мэгги Бэйрд уг бичлэгийг хуваалцаж, энэ төрлийн зүйлийг өөгшүүлэх нь эмэгтэйчүүдэд бодитоор аюултай хэмээн бичсэн байна. Мөн хөгжмийн ертөнцийн од Флейвор Флав (Flavor Flav) Левигийн хариу үйлдлийн тухай мэдээллийг X талбартаа нийтлэн «Чухал холбоотон байдал» хэмээн тодорхойлжээ.
Түүнчлэн дуучин Марен Моррис Инстаграм хуудсаараа дамжуулан өөрийн дуун дээр фитнессээс бичлэг нийтэлж эсэргүүцлээ илэрхийлсэн байна. Шэйн Гиллисийн хувьд өмнө нь ижил хүйстнүүдийг гадуурхсан, арьс өнгөөр ялгаварласан хошигнолууд нь ил болсны дараа уг шоуны жүжигчдийн бүрэлдэхүүнээс хасагдаж байсан түүхтэй юм.
