АНУ-ын чинээлэг иргэдийн зусдаг Нью-Йорк мужийн Лонг-Айлендын зүүн хэсэг болох Хэмптонс энэ зун брэндүүдийн сурталчилгаа, арга хэмжээгээр дүүрэн өнгөрлөө. Загвар өмсөгч Кендалл Женнерийн 818 текила брэнд The Surf Lodge клубт үдэшлэг зохион байгуулж, өөрийн бүтээгдэхүүнийг бүтээгчдийн хамт сурталчилсан нь энэ зуны томоохон арга хэмжээнүүдийн зөвхөн нэг хэсэг байв.
Энэ зун SET Active, Armani Beauty, Cowboy Colostrum зэрэг олон төрлийн брэндүүд Хэмптонст инфлюэнсер, алдартнууд болон хэрэглэгчдийг урин тусгай арга хэмжээ зохион байгуулжээ. Тухайлбал, брэндүүд дарвуулт онгоцны үдэшлэгээс эхлээд өглөөний иог, хүйтэн усанд суух зэрэг эрүүл мэндийн өдөрлөг хүртэл хийсэн байна. Инфлюэнсер Сара Жанеттигийн хэлснээр тэрээр энэ зун гэхэд Хэмптонст болсон брэндийн 15 орчим арга хэмжээнд оролцсон байна.
Бүтээгчдийн маркетингийн зах зээл тэлж байна
Энэхүү хандлага нь сошиал ертөнцийн бүтээгчид буюу инфлюэнсер маркетингийн салбар эрчимтэй өсөж байгаатай холбоотой юм. АНУ-д контент бүтээгчдэд зарцуулах сурталчилгааны зардал 2024 онд 29.5 тэрбум доллар байсан бол 2026 он гэхэд 44 тэрбум долларт хүрэх төлөвтэй байна. Түүнчлэн IAB-аас судалгаанд хамруулсан зар сурталчилгаа эрхлэгчдийн бараг тал хувь нь бүтээгчидтэй хамтрахыг зайлшгүй сонгох суваг гэж үздэгээ илэрхийлжээ.
