2026 оны хөлбөмбөгийн дэлхийн аварга шалгаруулах тэмцээний финал болох өдөр ойртсоор байна. Долдугаар сарын 19-нд Нью-Жерси хотын MetLife цэнгэлдэх хүрээлэнд Испани болон Аргентины шигшээ багууд аваргын төлөө тулалдана. Зургадугаар сарын 11-нд Мехико хотоос эхэлсэн энэхүү нэг сарын хугацаатай тэмцээн нь зохион байгуулагч гурван улс болох Мексик, Канад, АНУ-д зохион байгуулагдсан олон нийтийн арга хэмжээ, хөгжөөн дэмжигчдийн хүсэл тэмүүлэл, хөлбөмбөгийн сэдэвтэй гайхалтай хөгжмүүдээр улам бүр өнгө нэмж байна.
Энэ жилийн албан ёсны сүлд дуу болох "Dai Dai" нь тавдугаар сард цацагдсан бөгөөд Колумбын нэрт дуучин Шакира болон Нигерийн алдартай уран бүтээлч Burna Boy нарын хоолойг нэгтгэжээ. Уг дуу нь Афробит, бүжгийн поп, дэлхийн хэмжээний хэмнэл болон реггетоныг хослуулсан өвөрмөц бүтээл болсон байна. Дууны үг нь хөлбөмбөгийн үзэл санааг илэрхийлж, Месси, Кристиано Роналду, Бекхэм, Кака зэрэг хөлбөмбөгийн домогт тамирчдыг дурдсан нь сонсогчдын анхаарлыг татаж байна.
Шакира өмнө нь энэхүү дууны талаар ярихдаа: "Энэ бол мөрөөдөл нь хэтэрхий том гэж хэлүүлж байсан хүүхэд бүрт зориулсан мессеж" хэмээн онцолжээ. Мөн тэрээр аварга бүхэн ямар нэгэн бэрхшээлийг даван туулж, тэдэнд итгэдэг хэн нэгний дэмжлэгтэйгээр өнөөдрийн амжилтад хүрснийг сануулахыг зорьсон гэдгээ илэрхийлсэн байна. Түүнчлэн, тус дууны орлогын 100 хувийг дэлхий даяарх хүүхдүүдэд боловсрол болон хөлбөмбөгийн нөөц бололцоогоор хангах зорилготой FIFA Global Citizen Education санд хандивлах ажээ.
"Дэлхийн хөлбөмбөгийн хөгжмийн хатан хаан" гэгддэг Шакирагийн хувьд энэ нь 2010 оны Өмнөд Африкийн ДАШТ-д зориулсан алдартай "Waka Waka" дууны дараах хоёр дахь тохиолдол болж байна. Олон нийтийн сүлжээгээр хурдацтай тархаж, олны анхаарлыг татаж буй "Dai Dai" дуу нь хэдийнээ түүхэн дэх чухал хөлбөмбөгийн дуунуудын нэгд тооцогдож эхлээд байна.
